ინტერპოლის განცხადებით, განადგურებულია გლობალური კრიმინალური ქსელი, რომელიც კორონავირუსის ყალბი ვაქცინების კონტრაბანდას მსოფლიო მასშტაბით ეწეოდა.

კერძოდ, სამხრეთ აფრიკაში, იოჰანესბურგიდან ოდნავ მოშორებით მდებარე საწყობში კოვიდის 2 400-მდე ყალბი ვაქცინა და სამ მილიონამდე ყალბი სამედიცინო პირბადეა აღმოჩენილი. დაკავებულია 3 ჩინეთისა და ერთი ზამბიის მოქალაქე.

ასევე, ჩინეთში სამართალდამცავებმა კოვიდის 3 000-მდე ყალბი ვაქცინა აღმოაჩინეს. მომხდართან დაკავშირებით 80 ადამიანია დაკავებული.

ინტერპოლის განცხადებით, ვაქცინები მარილიანი ხსნარისგან იყო დამზადებული. ინტერპოლი კონტრაბანდისტებს დიდი ხნის განმავლობაში ადევნებდა თვალს.

„ნებისმიერი ვაქცინა, რომელსაც რომელიმე ვებ-საიტზე წააწყდებით სანდო არ არის. ის არ შემოწმებულა და შეიძლება საშიში იყოს. ყველა, ვინც ასეთ ვაქცინებს ყიდულობს, თავს საფრთხეში იგდებს და ფულს ორგანიზებულ კრიმინალებს აძლევს“, – განაცხადა ინტერპოლის გენერალურმა მდივანმა.