19 წლის ფეხბურთელის, გიორგი შაქარაშვილის საქმეზე მოწმის სახით გამოკითხული ლუკა ბეჟანიშვილის განცხადებით, მას შემთხვევის დღეს წვეულების მონაწილე ვახტანგ ახვლედიანმა დაურეკა და ადგილიდან წამოყვანა სთხოვა.

„ვახტანგ ახვლედიანმა დამირეკა და მითხრა, ნაცემი ვარო, ჩამოდი და წამიყვანეო. მე ჩავედი და ვუთხარი ჩვენ უბნელს, რომელიც „ტაქსისტია“ და ვთხოვე, რომ ჩამოეყვანა ვახო. ახვლედიანი იყო დამალული და არ იცოდა შაქარაშვილი გაუჩინარდა თუ არა“, – ამბობს ლუკა ბეჟანიშვილი. 

მისი თქმით, ადგილზე 3 მანქანა იმიტომ მივიდა, რომ მათ 6 ადამიანი – გიორგი შაქარაშვილი, კოკო ღიბრაძე, იაკობ ბრეგვაძე, გიორგი ქათამაძე, ვახტანგ ახვლედიანი და გური ამირხანაშვილი უნდა წამოეყვანათ.

„6 კაცი იყო და წასვლას ელოდებოდნენ, ლისზე უნდა ამოსულიყვნენ. სამი მანქანაც იმიტომ არის წასული და ერთში იჯდა მხოლოდ 4 კაცი – კოკო და გუგა წაყვნენ, რომ ადგილი ეჩვენებინათ და დანარჩენი 2 მანქანა, იმიტომ, რომ ეს 6 კაცი ჩატეულიყო შიგნით.

ისეთი სიტუაცია არ იყო, რომ 3 საათით დამდგარიყვნენ და ეძებათ, იქ კიდევ რამე რომ მომხდარიყო, ყველანი „შარში უნდა გახვეულიყვნენ“.

როგორც შეძლეს, მანქანიდან ეძახდნენ, ვინც იპოვეს წამოიყვანეს, ვისთანაც ტელეფონით ჰქონდათ კომუნიკაცია, დანარჩენებს ტელეფონი არ ჰქონდათ და ვერ მიაგნეს,“ – განაცხადა ბეჟანიშვილმა.

ცნობისთვის გიორგი შაქარაშვილის საქმეზე დღეს კიდევ სამი მოწმე, ფოტოგრაფი იაკობ ბრეგვაძე, ლუკა ბეჟანიშვილი და არასრულწლოვანი ლ.ქ. გამოიკითხა.

შეგახსენებთ, რომ 23 ივნისს, 19 წლის გიორგი შაქარაშვილის ცხედარი 4-დღიანი ძებნის შემდეგ მაშველებმა მდინარე არაგვში იპოვეს.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები.

ფეხბურთელის გარდაცვალების საქმეზე გუშინ 17 პირი დააკავეს.