შინაგან საქმეთა სამინისტროში გიორგი შაქარაშვილის საქმეზე ერთ-ერთი მოწმე, იუბილარი ანა გაბეჩავა იმყოფება.

გაბეჩავა უწყებაში კომენტარის გაკეთების გარეშე შევიდა. იუბილარის ადვოკატის, ლიკა ბითაძის თქმით, ანა გაბეჩავა შსს-ში ვიდეომასალების გასაცნობად დაიბარეს.

„მოვედით გარკვეული ვიდეოების დასათვალიერებლად. არ ვიცი, საქმის მასალებში არის თუ არა. გამოკითხვა არ იქნება. თუ არ ვცდები, არის აგარაკის კადრები, ავალთ და გეტყვით“, – აღნიშნა ანა გაბეჩავას ადვოკატმა ლიკა ბითაძემ.

შეგახსენებთ, რომ 23 ივნისს, 19 წლის გიორგი შაქარაშვილის ცხედარი 4-დღიანი ძებნის შემდეგ მაშველებმა მდინარე არაგვში იპოვეს.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები.

ფეხბურთელის გარდაცვალების საქმეზე 17 პირი დააკავეს.