19 წლის ფეხბურთელ გიორგი შაქარაშვილის მკვლელობის საქმეზე საპროცესო შეთანხმება შედგა.
„რუსთავი 2“-ის ინფორმაციით, სამ ბრალდებულს, რომელთაც ძალადობასა და ვახტანგ ჩიქოვანისთვის განზრახ მსუბუქი დაზიანებების მიყენებას ედავებიან, პროკურატურა კონკრეტული პირობებით გაურიგდა. სასამართლო საკითხის განხილვას 5 იანვრიდან გეგმავს.
გაათავისუფლებენ თუ არა სამ ბრალდებულს, ეს მოსამართლის კეთილ ნებაზეა დამოკიდებული. საპროცესო შეთანხმების გაფორმებაზე თანახმაა დაზარალებული მხარეც.
“არანაირ შემხებლობაში ისინი არ არიან გიორგის გარდაცვალებასთან, ეს იყო პირველი კონფლიქტი, რომელიც მოხდა წვეულების დარბაზში, გიორგის არც კი მიუღია მონაწილეობა,” – აცხადებს გიორგი შაქარაშვილის ბიძა მირიან ნიკოლაძე.
ფეხბურთელის მკვლელობის საქმეს 17 ბრალდებული ჰყავს, აქედან 3 საბურთალოელია, რომლებიც მხოლოდ საქმის პირველ ეპიზოდში ფიგურირებდნენ. საქმის მასალების მიხედვით, ისინი ნარეკვავში მდებარე აგარაკზე წვეულების დროს მომხდარ დაპირისპირებაში მონაწილეობდნენ.
