„მოქალაქეების“ ლიდერი ალეკო ელისაშვილი ამბობს, რომ ივერი მელაშვილის და ნატალია ილიჩოვას გირაოს სანაცვლოდ გათავლისუფლებამ გააღრმავა ნდობა „ქართულ ოცნებასა“ და მათ პარტიას შორის.
ამის შესახებ ელისაშვილმა პარლამენტში არჩილ თალაკვაძესთან შეხვედრის დაწყებამდე განაცხადა.
მისივე თქმით, მელაშვილის და ილიჩოვას გათავისუფლება მოლაპარაკებების შედეგია და არა პერსონალურად მისი.
„გუშინდელმა ფაქტმა რა თქმა უნდა ძალიან კარგი ფონი შეუქმნა ამ ყველაფერს, გააღრმავა ნდობა ჩვენს და „ქართულ ოცნებას“ შორის, ნამდვილად, რადგან ჩვენ გვინდოდა რომ ასე მომხდარიყო, ჩვენ ველოდით გუშინდელ გათავისუფლებას.
რაც შეეხება ვისი დამსახურებაა, მოლაპარაკების პროცესის. ძალიან გულდასაწყვეტი იყო, რომ ზოგ ზოგიერი განსაკუთრებით ოპოზიციიდან ცდილობდა გადაეკეთებინა ჩემი ნათქვამი და ზოგიერთი მედია ცდილობდა წარმოეჩინა, ის რომ ელისაშვილმა მიიწერა ეს ყველაფერი. მე ვთქვი მოლაპარაკების პროცესის და არა მითქვამს, რომ პერსონალურად ჩემი.
არ მითქვამს, რომ ისეთი მძლეთა-მძლე ვარ, რომ გავარღვიეთ, ეს მოლაპარაკების პროცესის დამსახურებაა, ეს იყო კარგი ნაბიჯი ნდობისთვის. ეს იმას ნიშნავს, რომ სხვა საკითხებზეც შეგვიძლია წინ წავიწიოთ და სხვა საკითხებზეც შევთანხმდეთ. ყოველ შემთხვევაში ამის იმედი გვაქვს“, – განაცხადა ალეკო ელისაშვილმა.
