ადამიანი როდესაც იკარგება, თუ ეს სრულწლოვანია, სამი დღის შემდეგ იწყება მისი ძებნა, – ამის შესახებ სამედიცინო ექსპერტმა, მაია ნიკოლეიშვილმა პრესკონფერენციაზე განაცხადა.
ამ განცხადებით ის თამარ ბაჩალიაშვილის საქმესთან დაკავშირებით იმ პირებს გამოეხმაურა, რომლებიც სამართალდამცავების მხრიდან დაგვიანებულ ძებნაზე აკეთებდნენ აქცენტს.
„ადამიანი როდესაც იკარგება, თუ ეს სრულწლოვანია, სამი დღის შემდეგ იწყება მისი ძებნა. იმიტომ, რომ სრულწლოვანი ადამიანი შეიძლება ვიღაცასთან დარჩეს. მას თავისი ცხოვრების განკარგვის უფლება სრულად აქვს. სამი დღის შემდეგ იწყება ძებნა და ჩვენ ვამბობთ, რომ სამ დღეში არ იპოვეს და ეს კატასტროფაა. სამ დღეში საქმე არ გაიხსნა, კატასტროფაა. კარგით რა, კონან დოილი მაინც წავიკითხოთ. გარკვეული დრო უნდა გავიდეს, რომ ძებნა დაიწყოს. მანამდე არსებობს ალბათობა, რომ დაბრუნდეს. ძებნა იწყება ყოველთვის გვიან. საშინელება მოხდა, მაგრამ პოლიციამ რატომ ვერ იპოვა, მაგაზე მე ვერ გიპასუხებთ,“- განაცხადა მაია ნიკოლეიშვილმა.
