პარტია „კანონი და სამართლის“ ერთ-ერთი დამფუძნებელი თაკო ჩარკვიანი გაერთიანებული ოპოზიციის „ძალა ერთობაშია“ დატოვების მიზეზად ქვეყანაში არსებულ პოლარიზებულ გარემოს ასახელებს. როგორც ჩარკვიანმა „პრაიმტაიმნიუსთან“ განაცხადა, საქართველოში არსებული ვითარება ხელისუფლების წისქვილზე ასხამს წყალს.
„ყველანაირი კვლევით, რაც ჩვენ ჩავატარეთ, დაადასტურა, რომ ხალხი ითხოვს რაღაც ახალს. არის კითხვები: რა გვეშველება? რა დღეში ვართ, რომ მკვლელობებია? რა დღეში ვართ, რომ ასეთი შიმშილია? რა დღეში ვართ, რომ ასეთი სიღარიბეა? არის ეს ყველაფერი და ამ დროს მიდის წარმოუდგენელი პოლარიზება პოლიტიკური სპექტრისა.
პოლარიზებული პოლიტიკური სპექტრი, თამამად შემიძლია ვთქვა, რომ მხოლოდ და მხოლოდ ხელისუფლების წისქვილზე ასხამს წყალს. ეს არის მხოლოდ ორიენტირებული იმაზე, რომ მოძლიერდეს ოპოზიცია და გამარჯვების ფორმულა იყოს. შეუძლებელია, რომ ახალგაზრდების ჩართულობით საზოგადოებას სიახლე არ შევთავაზოთ. ეს ადამიანი (გულისხმობს გიორგი ვაშაძეს), რომელმაც იუსტიციის სახლი გააკეთა, დიდი შეცდომა იქნება, რომ ქვეყანამ არ გამოიყენოს“,- განაცხადა ჩარკვიანმა.
ინფორმაციისთვის, დღეს პარტია „ახალი საქართველოს“ ლიდერმა გიორგი ვაშაძემ და პარტია „კანონი და სამართალის“ ლიდერმა თაკო ჩარკვიანმა ახალი პოლიტიკური პლატფორმა შექმნეს.
