„ერთიანი ნაციონალური მოძრაობის“ ერთ-ერთი ლიდერის, ზაალ უდუმაშვილის განცხადებით, თბილისის მერია რიყის პარკში, ხვალ დაანონსებული ოპოზიციის შეკრებისთვის, სცენის მონტაჟის საშუალებას არ აძლევს
„ხვალ ოპოზიცია გეგმავს, რომ რიყის პარკში გამართოს 15 მაისის საორგანიზაციო შეხვედრა, სადაც ჩვენს საზოგადოებას ვამცნობთ, თუ რა გეგმები აქვს ოპოზიციას 15 მაისის აქციასთან დაკავშირებით.
დღეს, როდესაც აქ მოვიდა ჩვენი ტექნიკური ჯგუფი, რომელსაც უნდა დაეწყო სცენის მონტაჟი, სასწრაფოდ გამოცხადდნენ მერიის თანამშრომლები, რომლებმაც განაცხადეს, რომ ჩვენ თურმე, არ გვაქს უფლება აქ სცენა ავაწყოთ. მინდა განვმარტო, რომ ჩვენ გავაგზავნეთ შესაბამისი წერილი თბილისის მერიაში. მიუხედავად იმისა რომ, ჩვენ კანონის მიხედვით არანაირი ვალდებულება არ გვქონდა, რაიმე შეტყობინება გაგვეგზავნა მერიისთვის.
იმიტომ რომ, ასეთი შეტყობინებები იგზავნება, მხოლოდ მაშინ როდესაც ფერხდება სატრანსპორტო საშუალებების გადაადგილება. ახლა რიყის პარკში ვიმყოფებით საჯარო სივრცეში, სადაც ნებისმიერ ადამიანს და პოლიტიკურ პარტიას აქვს შეკრების გამართვის უფლება. ამისთვის არანაირი წინასწარი გაფრთხილება არ არის საჭირო.
ჩვენ მაინც გავაგზავნეთ წინასწარი წერილი თბილისის მერიაში და განვმარტეთ, რომ ხვალ აქ იგეგმება შეკრება. მიუხედავად ამისა მერიის თანამშრომლები უარს აცხადებენ, რომ დაიწყოს სცენის მონტაჟი. ეს არის სიტყვისა და გამოხატვის თვისუფლების პირდაპირი შეზღუდვა. გასაგებია ხელისუფლებას ძალიან ეშინია 15 მაისის და ყველა უკანონო ქმედებას ჩადის იმისათვის, რომ ეს შეკრება არ გაიმართოს“,- განაცხადა უდუმაშვილმა.
