აშშ-ის ყოფილი ელჩი ბაჰრეინის სამეფოში და პოლიტიკური კონსულტანტი საქართველოში ჩატარებულ არჩევნებს ეხმაურება.
როგორც ადამ ერელი „იმედის“ ვაშინგტონის ბიუროსთან ინტერვიუში აღნიშნავს, კარგი იქნება, თუ ოპოზიცია პარალმენტში იმ ხმებს გამოიყენებს, რაც მიიღეს და სისტემურად ეცდება რაიმე შეცვალოს.
როგორც ყოფილი ელჩი ამბობს, „ხმა პარლამენტიდან უნდა ისმოდეს და არ ქუჩიდან“.
„ოპოზიციას საკუთარი ამომრჩევლის მიმართ დიდი პასუხისმგებლობა გააჩნია. დემოკრატიის ნაწილია, რომ შენ აღიარებ დამარცხებას და მეორე დღეს იღვიძებ და აგრძელებ ბრძოლას სისტემის შიგნით. დემოკრატები არ იყვნენ ბედნიერნი იმით, რომ 2016-ში ტრამპმა გაიმარჯვა, თუმცა მათ საკუთარი მომხრეების ქუჩაში გამოყვანა არ დაუწყიათ ან უარი არ უთქვამთ მთავრობას შეერთებოდნენ. ერთია, როდესაც წარადგენ საჩივარს ან იწყებ იურიდიულ დავას სახელმწიფო უწყებების გავლით, ეს სამართლიანია და კანონიერი, თუმცა მეორე საკითხია ის, რომ იწყებ მხარდამჭერების მობილიზებას სისტემის დასამხობად, აქედან გამომდინარე, ჩემი კომენტარი იქნებოდა, რომ თუ პრობლემა გაქვს შედეგებთან, აწარმოე დავები სასამართლოსა და სახელმწიფო უწყებებში, მაგრამ არ შეიყვანო ქვეყანა ჩიხში და ძალით არ უბიძგო კონფორნტაციისკენ, რაც ძალიან საშიში და გაუთვალისწინებელი ტაქტიკაა.
რთულია მომდევნო დღეებში მოვლენების განსაზღვრა, თუმცა გეტყვით, რომ 5-მა პარტიამ გადალახა საარჩევნო ბარიერი და მოხვდა პარლამენტში, რაც ადრე გამორიცხული იქნებოდა, ამიტომ მე რომ ამ პარტიების ადგილას ვყოფილიყავი საქართველოში, მენდომებოდა შესაძლებლობის გამოყენება, მენდომებოდა ჩემი ადგილი პარლამენტში და ჩემი ხმის მიწვდენა. ეს ხმა პარლამენტიდან უნდა ისმოდეს და არა ქუჩაში. ჩემი რჩევა იქნება, რომ გამარჯვების შემთხვევაში აიღო ის, რაც გეკუთვნის და არ მოისროლო ის სადმე იმ მიზნით, რომ მეტი მიიღო. იმუშავე სისტემის შიგნით, იმისთვის, რომ გააუმჯობესეო ის. ჩემთვის ეს იქნებოდა ხელიდან გაშვებული შესაძლებლობა, რომ მენახა ქართველების მიერ პარლამენტში საკუთარი წარმომადგენლობის გაფართოების შანსის დაკარგვა, იმიტომ რომ მათ არ მიიღეს ის ოდენობა, რაც მათ სურდათ“ – აცხადებს ადამ ერელი.
ცნობისთვის, ოპოზიცია აცხადებს, რომ პარლამენტში არ შევლენ. ჯერჯერობით ამ თემასთან დაკავშირებით ოპოზიციაში მოლაპარაკებები მიმდინარეობს, თუმცა როგორც გუშინ, „ევროპული საქართველოს“ წევრმა, გიგი უგულავამ განაცხდა, თითქმის ყველა პარტია ერთ აზრზე თანხმდება.
რა მოხდება, თუ ოპოზიცია არჩევნების შედეგებს ბოიკოტს გამოუცხადებს და პარლამენტში არ შევა
