მედიკოსთა ნაწილი იმედოვნებს, რომ კორონავირუსი გარკვეული დროის გასვლის შემდეგ, გაქრება. როგორც ინფექციური საავადმყოფოს ბოქსირებული განყოფილების უფროსმა, მარინა ენდელაძე „პრაიმტაიმნიუსთან“ საუბრისას განაცხადა,  კორონავირუსი სეზონური ვირუსის სახეს არ მიიღებს.

„კორონავირუსი სეზონური არ იქნება, რადგან მას სეზონურობა არ ახასიათებს. სეზონური ვირუსი იმ შემთხვევაში არის, როცა ის ზამთარში  ვრცელდება უფრო მეტად და არა – ზაფხულში. ვფიქრობ, რომ გარკვეული დრო უნდა და ეს ვირუსი გაქრება“, – განაცხადა ენდელაძემ.

ენდელაძეს ვკითხეთ, 28 აგვისტოს მონაცემებით, სამი ინფიცირების წყაროს დაუდგენლობა, მიანიშნებს თუ არა იმაზე, რომ ვირუსი ქვეყანაში უფრო და უფრო ძლიერდება, ენდელაძე გვპასუხობს:

„დღეის მონაცემებით, არის უცნობი სამი წყარო, შესაძლოა, ამ სამ წყაროს კონტაქტები გამოუჩნდეს. ზოგადად, ქვეყანაში დრამატული სიტუაცია არ არის. საგანგაშო მდგომარეობა არ იქნება, თუ ისევ დავიცავთ რეკომენდაციებს“,- განაცხადა ენდელაძემ.

ინფორმაციისთვის, დღეს საქართველოში კორონავირუსის კიდევ 8 შემთხვევა დაფიქსირდა. მათგან სამის ინფიცირების წყარო უცნობია.

ავტორი: ეკატერინე ზარნაძე