მას შემდეგ, რაც „ლელოს“ ერთ-ერთ დამფუძნებელს, მამუკა ხაზარაძეს კორონავირუსი დაუდასტურდა, პარტიის თანამშრომელთა ნაწილი თვითიზოლაციაში გადავიდა. ამის შესახებ „პრაიმტაიმნიუსს“ პარტიის პრესსამსახურში განუცხადეს.
პარტიის პრესსამსახურის თქმით, ხაზარაძის დაინფიცირების ფაქტი პარტიის საარჩევნო კამპანიის ჩვეულ რეჟიმში გაგრძელებას ხელს არ შეუშლის.
„მამუკა ხაზარაძე ბოლო დღეების განმავლობაში ოფისში არ ყოფილა. ის ბოლო დღეების განმავლობაში არც გადაცემებში ყოფილა სტუმრად მიწვეული. თანამშრომლების გარკვეულ ნაწილთან შეხება ჰქონდა, რამდენიმე ადამიანი, ვისთანაც შეხება ჰქონდა, გადაყვანილია თვითიზოლაციაში, მათ შორის, პოლიტიკოსები არ ყოფილან.
საარჩევნო კამპანია ჩვეულ რეჟიმში გაგრძელდება და დამატებით განცხადებას მამუკა ხაზარაძე თავად გააკეთებს“,- გვითხრეს „ლელოს“ პრესსამსახურში.
ინფორმაციისთვის, მამუკა ხაზარაძეს კორონავირუსი დღეს დაუდასტურდა.
