თამარ ბაჩალიაშვილის ოჯახის ადვოკატი აცხადებს, რომ გამოძიება საქმესთან დაკავშირებით ახალ დეტალებზე არ საუბრობს.
როგორც მიხეილ რამიშვილმა ჟურნალისტებს განუცხადა, ამ ეტაპზე გამოძიება საქმის მასალებს ეცნობა, რადგან საგამოძიებო უწყებას აღნიშნული მასალები ორი დღის წინ გადაეცა.
„რაც შეეხება ვერსიას, რაც მასმედიაში გაჟღერდა, ყველა ვერსიამ უნდა იარსებოს და ყველაფერზე უნდა იყოს რეაგირება მომხდარზე. ოჯახის პოზიცია არის ძალიან მტკიცე და ძალიან მყარი, რომ საქმე ბოლომდე უნდა იყოს გამოძიებული.
მშობლებმა დააფიქსირეს პოზიცია, რომ შესაძლოა, სწორედ ამის გამო ნერვიულობდა ბავშვი იმ პერიოდის განმავლობაში. შესაბამისად, არ არის გამორიცხული, მისი პროფესიიდან და თავისი საქმიანობიდან გამომდინარე, ფაილებზე წვდომა ჰქონოდა.
ამ ეტაპზე გამოძიება ამბობს, რომ ეცნობა საქმის მასალებს. იმიტომ რომ ეს საქმე მიიღეს ორი დღის უკან და დიდია ეს საქმის მასალა და ვერ მოასწრეს გაცნობა“, – განაცხადა მიხეილ რამიშვილმა.
შეგახსენებთ, რომ დღეს შინაგან საქმეთა სამინისტროში თამარ ბაჩალიაშვილის მშობლები და ოჯახის ადვოკატი იმყოფებოდნენ.
