წყნეთის მე-5 შესახვევში მიწის მასა ჩამოიშალა და სამანქანე გზის ნაწილი ჩაინგრა. მომხდარის შედეგად არავინ დაშავებულა.
აღნიშნულ ტერიტორიაზე ორსართულიანი ობიექტი შენდება. ადგილობრივების განცხადებით, მიწის ჩამოშლა სწორედ მშენებლობამ გამოიწვია. მათი თქმით, სამშენებლო ობიექტის ტერიტორია მეწყერსაშიში ზონაა.
სამშენებლო კომპანიის ხელმძღვანელების მტკიცებით კი მშენებლობა ნებართვის საფუძველზე, გეგმის თანახმად მიმდინარეობს, თუმცა სამანქანე ასფალტის ზედაპირი ნაყარ მიწაზე იყო დაგებული, რამაც მიწის ჩამოშლა გამოიწვია.
ადგილზე იმყოფებიან თბილისი ენერჯის ბრიგადები. მათი განცხადებით, ტერიტორიაზე არსებული მილები არ დაზიანებულა, თუმცა ამ დროისთვის უსაფრთხოების მიზნით 130-მდე ოჯახს გაზის მიწოდება შეუწყდა და მიწოდება 3-4 საათში აღდგება.
