გამოდით ქუჩაში არა ჩემთვის, არამედ თქვენი მომავლისთვის,- ამის შესახებ რუსი ოპოზიციონერი, ალექსეი ნავალნი აცხადებს. ინფორმაციას Meduza ავრცელებს.
„რისი ეშინია ამ მილზე შემომჯდარ გომბეშოს? რისი ეშინიათ ბუნკერის ქურდებს ყველაზე მეტად? მათ ხალხის ქუჩაში გამოსვლის ეშინიათ, ვინაიდან ეს პოლიტიკური ფაქტორია, რომლის უგულებელყოფაც შეუძლებელია. ეს ყველაზე მთავარი და ყველაზე მნიშვნელოვანი ფაქტორია. ესაა პოლიტიკის არსი. არ შეგეშინდეთ, გამოდით ქუჩაში. გამოდით ქუჩაში არა ჩემთვის, არამედ თქვენი მომავლისთვის“, – განაცხადა ალექსეი ნავალნიმ.
შეგახსენებთ, რომ 17 იანვარს ნოვიჩოკით მოწამვლის შემდეგ პირველად რუსი ოპოზიციონერი, ალექსეი ნავალნი გერმანიიდან რუსეთში ბრუნდებოდა. თუმცა,რუსეთის სამართალდამცავი ორგანოების თანამშრომლებმა ნავალნი მოსკოვის შერემეტიევოს აეროპორტში, საპასპორტო კონტროლზე დააკავეს.
რუსეთის ფედერალური პენიტენციური სამსახურის ინფორმაციით, ოპოზიციონერის დაკავების მიზეზი გამოსაცდელი ვადის პირობების სისტემატური დარღვევაა. ნავალნის ადვოკატის თქმით, რუს ოპოზიციონერს პატიმრობა 30 დღით, 15 თებერვლამდე შეუფარდეს.
