დღეს პარლამენტში მინისტრობის კანდიდატების ნაწილს მოუსმენენ და კომიტეტებში მთავრობისადმი ნდობის გამოცხადების საკითხზე იმსჯელებენ.
დღეს, კომიტეტების ფორმატში გარემოს დაცვისა და სოფლის მეურნეობის; ეკონომიკისა და მდგრადი განვითარების; რეგიონული განვითარებისა და ინფრასტრუქტურის; ფინანსთა და საგარეო საქმეთა მინისტრობის კანდიდატებს და შესაბამისად, სამთავრობო პროგრამას მოუსმენენ.
21 თებერვალს კი საპარლამენტო კომიტეტებში დანარჩენი კანდიდატების მოსმენა გაგრძელდება.
22 თებერვალს პრემიერობის კანდიდატი და კაბინეტი პოლიტიკურ ჯგუფებს – საპარლამენტო უმრავლესობასა და ოპოზიციას შეხვდებიან. ამავე დღეს პარლამენტი, პლენარული სხდომის ფორმატში, ნდობის გამოცხადებაზე გადაწყვეტილებას მიიღებს.
მინისტრთა კაბინეტში ცვლილებებია:
მთავრობას ირაკლი ღარიბაშვილი უხელმძღვანელებს. თავდაცვის მინისტრის თანამდებობაზე წარდგენილია თავდაცვის მინისტრის მოადგილე ჯუანშერ ბურჭულაძე. რეგიონული განვითარებისა და ინფრასტრუქტურის მინისტრის პოსტი დატოვა მაია ცქიტიშვილმა, რომელსაც მისი პირველი მოადგილე ირაკლი ქარსელაძე შეცვლის. თანამდებობაზე რჩება ყველა სხვა მინისტრი.
