„ნაციონალური მოძრაობის“ ერთ-ერთი ლიდერის, ზაალ უდუმაშვილის განცხადებით, 21 ნოემბერს „სირცხვილის დერეფნის“ მოწყობა არ განიხილება.
მისივე თქმით, პარტიები იმსჯელებენ, რა ფორმით შეიძლება ჩატარდეს აქცია არჩევნების მეორე ტურზე.
„რაც შეეხება 21 ნოემბრის აქციას, ჯერჯერობით გადაწყვეტილება მიღებული არა რის. დღეს უფრო დეტალურად ვიმსჯელებთ, თუ რა ფორმით ჩავატარებთ აქციებს. ნებისმიერ შემთხვევაში, აქცია იქნება, ოღონდ კონკრეტულ ფორმაზე დღეს შევთანხმდებით. ბევრი ვერსია განიხილება, მათ შორის „ცოცხალი ჯაჭვიც“, ასევე სხვადასხვა ფორმის აქციები. დღეს ყველა პარტია საკუთარ პოზიციას წარმოადგენს და საბოლოოდ შევჯერდებით ერთ მოდელზე, რომელიც ყველასთვის მისაღები იქნება. „სირცხვილის დერეფანი“ არ განიხილება, რადგან ჩვენი ამომრჩეველია თუ სხვისი, ამას მნიშვნელობა არ აქვს, ჩვენ არ უნდა მოვახდინოთ ზეწოლა იმ ამომრჩეველზე, რომელიც მიდის და ხმას აძლევს“,- განაცხადა უდუმაშვილმა.
ამ წუთებში „ლელოს“ ოფისში ოპოზიციური პარტიების შეხვედრა მიმდინარეობს.
