ჩემი ვერსიით, პრეზიდენტმა მის მიმართ ოპოზიციის განწყობებიდან გამომდინარე თავი მოარიდა შეხვედრაზე დასწრებას, – ამის შესახებ პარტია „სამართლიანობისთვის“ ლიდერმა, ეკა ბესელიამ საქართველოს პირველი არხის გადაცემაში „კვირის ინტერვიუ“ სტუმრობისას განაცხადა.
„პრეზიდენტი თავისი კონსტიტუციური ფუნქციით უნდა იყოს მედიატორი. ის ხომ ზეპარტიული პოლიტიკური ფიგურაა და მისი ამ შეხვედრაზე არყოფნა ცოტა გაუგებარია. ეს არ იყო რელევანტური. იმიტომ, რომ მარტო სასახლეს ხომ არ აქვს ის დატვირთვა, რა დატვირთვითაც ის სასახლე შეირჩა?! თუ ვინმემ შეიძლება, კონსტიტუციურად მედიაცია აწარმოოს ქვეყანაში ასეთი პოლიტიკური კრიზისის დროს, ეს უნდა იყოს პრეზიდენტი და სამწუხაროა, რომ ეს ასე არ ხდება. ახლა უკვე ალბათ, აშშ-ის ელჩთან ერთად, ევროკავშირის ელჩი გააგრძელებს ამ ძალიან მნიშვნელოვან მოლაპარაკებას“, – განაცხადა ბესელიამ.
