23 წლის თამარ ბაჩალიაშვილის გარდაცვალების ფაქტს ფრაქცია „ნაციონალური მოძრაობის” თავმჯდომარე რომან გოცირიძე გამოეხმაურა.
გოცირიძე აღნიშნავს, რომ ბოლო სამი წლის განმავლობაში, ფაქტობრივად, ყველაფერი გაუარესებულია.
„დღე არ გავა, რომ რაღაც საშინელება არ გავიგოთ. ყოველდღე ხდება მკვლელობები, ძალადობა. ეს არის იმ ატმოსფეროს შედეგი, რომელიც „ქართულმა ოცნებამ“ შექმნა. „ქართულმა ოცნებამ“ კრიმინალი საარჩევნოდ და პოლიტიკური მიზნებისთვის არაერთხელ გამოიყენა რვა წლის განმავლობაში. ქვეყანაში დაუსჯელობის სინდრომი იქმნება.
თავს გამოყოფს დამნაშავეთა სამყარო, რომლის მოთოკვა უკვე შეუძლებელია მსგავსი ხელისუფლების მიერ. დამნაშავე არის ხელისუფლება. სტატისტიკა ვნახოთ, ბოლო სამი წლის განმავლობაში, ფაქტობრივად, ყველაფერი გაუარესებულია. ერთადერთი გამოსავალია ხელისუფლების შეცვლა, კრიმინალის მოთოკვა და საკუთარი ადგილის მიჩენა, საკუთარი ადგილი არის ციხე“, – განაცხადა გოცირიძემ.
გოცირიძე აცხადებს, რომ ხელისუფლებამ და გამოძიებამ ნდობა დაკარგა.
„როდესაც ყველა გახმაურებულ საქმეში ხელისუფლება მონაწილეობს და ამ საქმეებს საკუთარი ინტერესების სასარგებლოდ წარმართავს, ეს ნიშნავს იმას, რომ ხელისუფლებამ ნდობა დაკარგა და ნდობა დაკარგა გამოძიებამ. მათ არავინ ენდობა“, – აცხადებს რომან გოცირიძე.
თეთრიწყაროში 23 წლის თამარ ბაჩალიაშვილს 18 ივლისიდან ეძებდნენ.
ახალგაზრდა ქალი თბილისში სახლიდან საკუთარი ავტომობილით გავიდა და მას შემდეგ აღარ დაბრუნებულა. მისი მანქანა დღეს მწყემსმა იპოვა.
