ეს არის ძალიან დიდი გამარჯვება ყველა ოპოზიციური პარტიისა, საქართველოში მოქმედი ჯანსაღი არასამთავრობო სექტორისა და ახალგაზრდებისთვის, – ამის შესახებ ფრაქცია „ნაციონალური მოძრაობის“ თავმჯდომარემ რომან გოცირიძემ საკონსტიტუციო ცვლილებების მიღების სემდეგ განაცხადა.
გოცირიძე ფიქრობს, რომ გიორგი რურუა გათავისუფლდება.
„მათი სატელიტური პარტიები, რომელთა პირადი ინტერესი იყო 1 პროცენტიანი ბარიერი და მათაც კი არ აწყობდათ ძველი საარჩევნო სისტემით არჩევნების ჩატარება. ეს არის ძალიან დიდი გამარჯვება ყველა ოპოზიციური პარტიისა, საქართველოში მოქმედი ჯანსაღი არასამთავრობო სექტორისა, იმ ახალგაზრდებისთვის, რომლებიც ითხოვენ გიორგი რურუას გათავისუფლებას. მათ აქ დაღვარეს სისხლი.
ანტისაოკუპაციო მოძრაობა გახდა ერთ-ერთი მთავარი მოტორი ამ ცვლილებებისა და რა თქმა უნდა, უდიდესი როლი ითამაშა საერთაშორისო თანამეგობრობამ და ჩვენმა საერთაშორისო პარტნიორებმა.
ეს ძალისხმევა გამოიღებს შედეგს, გიორგი რურუა გათავისუფლება მოუწევთ, წინააღმდეგ შემთხვევაში ის საარჩევნო პროცესში შევა პოლიტიკური პატიმრით, ეს იმას ნიშნავს, რომ აპირებს კვლავ ძალადობრივი რეჟიმით მოსყიდვას და არადემოკრატიული არჩევნების ჩატარებას“, – განაცხადა რომან გოცირიძემ.
პარლამენტმა საკონსტიტუციო ცვლილებები მესამე მოსმენით, საბოლოოდ მიიღო. კანონპროექტს 117-მა დეპუტატმა დაუჭირა მხარი. 2020 წლის არჩევნები 120/30 სისტემით ჩატარდება.
