მარტვილში, სალხინოს მამათა მონასტრის ჭიშკარს ამ დროისთვის ბოქლომი ადევს და იქ მედიის წარმომადგენლებს არ უშვებენ.
ეს ჭიშკარი ერთადერთი შესასვლელია,საიდანაც მომლოცველები ტაძარში შესვლას შეძლებენ. მრევლის შესვლას ტაძარში კი სამართალდამცველები აკონტროლებენ.
ჭყონდიდის ეპარქიაში გუშინ მომხდარ ინციდენტთან დაკავშირებით, ჭყონდიდელმა მღვდელმთავარმა საგანგებო განცხადება გაავრცელა.
მიტროპოლიტმა სტეფანე კალაიჯიშვილმა „ერთსულოვნებასთან“ ინტერვიუში განაცხადა, რომ ის აპირებს ეკლესიიდან განკვეთოს ის სამი სასულიერო პირი, რომლებიც სალხინოს ტაძარში მომხდარ დაპირისპირებაში მთავარ როლს ასრულებდნენ, თუ ისინი ამ ქმედებას მის წინაშე საჯაროდ არ მოინანიებენ:
„დიაკონი ანანია ამბიონზე ავარდა და ამან გამოიწვია ხალხის გაღიზიანება, საბოლოო ჯამში, ჩოჩქოლში გადაიზარდა და ჩაიშალა ლოცვა. მერე თვითმარქვია წინამძღვარმა განაცხადა, რომ აღდგომამდე დაკეტილია მონასტერიო, მას არანაირი გადაწყვეტილების უფლება არ გააჩნია. მისი გადაწყვეტილებები არაფერს არ ნიშნავს.
რადგან საჭირო გახდა, რომ უფრო მტკიცე ზომები მივიღო, სხვა გზა არ დამრჩენია,ვაცხადებ და შაბათს უკვე აღვასრულებ: თუ იღუმენი დანიელი არ მოინანიებს ამ ამბოხს და ამ ეკლესიის წინააღმდეგ მიმართულ მოქმედებებს, გადაწყვეტილებას ვღებულობ, რომ უნდა განვკვეთო ეს ადამიანი და დაიყვანება მონაზვნობამდე, თუ არ მოინანიებს. შაბათს ვიქნები თამაკონში, მოვიდეს და გამოაცხადოს საქვეყნოდ სინანული.
ასევე, დიაკონ ანანიას და ბერდიაკონ პეტრე ღუდუშაურს ასევე განვკვეთავ თუ არ მოინანიებენ. იქ იყო ერთი ბერმონაზონი, რომელსაც სამღვდელო ხარისხი არ გააჩნია და თუ ისიც არ შეწყვეტს, მივიღებ ზომებს“, – განაცხადა მიტროპოლიტმა სტეფანემ.
ასევე, მან გაფრთხილება მისცა სასულიერო პირებს მირიან მესხაძესა და კონსტანტინე გაბისონიასაც.
ჭყონდიდის ეპარქიის მმართველმა მეუფე სტეფანემ იმ ცვლილებებზეც ისაუბრა, რომელიც მარტვილის ეპარქიაში ტაძრების და მონასტრების მმართველობაში განხორციელდება:
„ვაცხადებ, რომ მღვდელი გოჩა ლიპარტელიანი დანიშნულია სალხინოს ყოვლადწმინდა ღვთისმშობლის სახელობის ტაძრის წინამძღვრად. მასვე ევალება მღვდელმოქმედება წაჩხუროს მონასტერსა და სოფელ სალხინოს მახლობლად მდებარე სხვა ტაძრებში. ასევე, ბერდიაკონი გიორგი კოპალიანი დანიშნულია სალხინოსა და წაჩხურუს მამათა მონასტრების კეთილმოწესედ და ასევე სალხინოსა და წაჩხურუს მამათა მონასტრების წინამძღვრობას ამ საგანგებო ვითარებაში ჩემს თავზე ვიღებ. ვაცხადებ, რომ ყველანაირი ძალმოსილება იმ ფარგლებში რაშიც ვმოქმედებ გამაჩნია და ტყუილად ნუ ლაპარაკობენ რომ მე რაღაცა უფლებები მეზღუდება“, – განაცხადა მიტროპოლიტმა.
მეუფე სტეფანეს თქმით, ის ბზობის დღესასწაულს სალხინოში ჩაატარებს და მრევლს მთელი საქართველოდან მოუწოდა, რომ ბზობა მასთან ერთად სალხინოს მამათა მონასტერში აღნიშნონ.
ავტორი: თეა შონია
