პანკისის ხეობაში სპეცოპერაციის შედეგად მოკლული თემირლან მაჩალიკაშვილის მამა მალხაზ მაჩალიკაშვილი „ნაციონალური მოძრაობის“ სავარაუდო პრემიერობის კანდიდატებს ასახელებს. როგორც მაჩალიკაშვილმა „პრაიმტაიმნიუსთან“ საუბრისას განაცხადა, „ნაცმოძრაობამ“ სიის პირველ ნომრად საქართველოს ყოფილი პრეზიდენტი მიხეილ სააკაშვილი ან ყოფილი პირველი ლედი სანდრა რულოვსი უნდა წარადგინოს.
„მე „ნაცმოძრაობაში“ ვხედავ ორ კანდიდატს, რომელიც შესაძლოა, წარადგინონ პრემიერ-მინისტრობის კანდიდატად. პირველ რიგში, ეს არის მიხეილ სააკაშვილი, მეორე არის სანდრა რულოვსი. დანარჩენებზე უკმაყოფილო არ ვარ, მაგრამ მე ჩემს აზრს გამოვთქვამ.
პირდაპირ გეტყვით, მიხეილ სააკაშვილი, საქართველოს გარკვეულ ნაწილს უნდა თუ არ უნდა, არის მსოფლიო პოლიტიკის ამომცნობი და შეთავსებადი ადამიანი. ამას ემატება დიდი რეფორმატორობა და განათლება. მან წუმპიდან ამოიყვანა შევარდნაძის დროინდელი საქართველო და მთელ მსოფლიოს გააცნო. ასე თუ ისე, იყო დაშვებული შეცდომები, მაგრამ მან შექმნა სახელმწიფო და გაიყვანა მსოფლიო არენაზე. ასეთი ადამიანი დღევანდელ საქართველოს სჭირდება.
სანდრა რულოვსს რაც შეეხება, ის არის ერთ-ერთი უძლიერესი კანდიდატი, ჭკვიანი და განათლებული ადამიანი, რომელსაც სიმდიდრე, ძვირფასეულობა არ აინტერესებს. ის არის ევროპული დონის ჩამოყალიბებული ადამიანი, ქველმოქმედი და მზრუნველი. საქართველოს ზუსტად განათლებული და ხალხზე მზრუნავი ადამიანი სჭირდება“,- განაცხადა მაჩალიკაშვილმა.
ნახეთ – შეარჩია თუ არა „ნაცმოძრაობამ“ მიხეილ სააკაშვილი პრემიერობის კანდიდატად.
იმ შემთხვევაში, თუ კორონავირუსის პანდემიამ დღის წესრიგი არ შეცვალა, საპარლამენტო არჩევნები 2020 წლის 31 ოქტომბერს გაიმართება. არჩევნების შემდეგ, პარლამენტი 30 მაჟორიტარით და 120 – პროპორციულ სიაში შესული შესული დეპუტატით დაკომპლექტდება.
ავტორი: ეკატერინე ზარნაძე
