ცხინვალის საოკუპაციო ძალების წარმომადგენლების მიერ გატაცებული ზაზა გახელაძის ოჯახს დამატებითი ცნობები მამაკაცის ადგილსამყოფელის და მდგომარეობის შესახებ ამ დრომდე არ მიუღია. ოჯახში ამბობენ, რომ ისევ უშედეგოდ ელიან წითელი ჯვრის წარმომადგენლების იმ კლინიკაში შესვლას, სადაც გახელაძე მკურნალობს. ოჯახი კიდევ უფრო ეფექტური ნაბიჯების გადადგმას მოითხოვს.
გახელაძის დაკავებასთან დაკავშირებით, რუსეთის საგარეო საქმეთა სამინისტრომ განცხადება გაავრცელა. პრეს-სპიკერის თქმით, გახელაძე შეიარაღებული იყო და “სამხრეთ ოსეთის“ დე-ფაქტო საზღვარი 300 მეტრით გადაკვეთა.
რუსეთის საგარეო საქმეთა სამინისტროს წარმომადგენლის ვერსიით, ქვემო ჭალაში მცხოვრები მამაკაცი რუს მესაზღვრეებს გადაეყარა. 10-ჯერ გაისროლა, ხოლო საპასუხო ცეცხლის გახსნისას დაიჭრა.
ოჯახი აღნიშნულ ვერსიას არ ეთანხმება. მათი თქმით, სოკოს საკრეფად წასულ გახელაძეს, რომელიც საქართველოს ტერიტორიაზე იმყოფებოდა, თან სანადირო თოფი ჰქონდა, საიდანაც 10-ჯერ ვერ გაისროდა.
,,არც ბანერებია, არც ხაზი. არანაირი გამყოფი ხაზი არ არსებობს… სანადირო თოფი ნამდვილად ჰქონდა ჩემს შვილს. თქვენ კარგად იცით, სანადირო თოფიდან 10 გასროლას ვერ განახორციელებდა. შეიძლება გაისროლა, მაგრამ მაგდენს ნამდვილად ვერ გაისროდა”, – ამბობს დაკავებულის დედა ნანა გახელაძე.
33-წლის ზაზა გახელაძე 11 ივლისს დილით დააკავეს. არსებული ინფორმაციით, ცხინვალის საკარანტინო სივრცეშია მოთავსებული.
ავტორი: თათია გოლოშვილი
