გიორგი შაქარაშვილის გარდაცვალების საქმეზე დაკავებული მორაგბის არჩილ გაგნიძის ადვოკატმა მოსამართლე მაია ოშხარელის აცილების შუამდგომლობა დააყენა, თუმცა არ დაუკმაყოფილეს.
როგორც ადვოკატი აცხადებს, დაცვის მხარეს კანონით დადგენილ ვადაში არ ეცნობა წინასასამართლო სხდომის გაგრძელების შუამდგომლობის შესახებ.
„მოსამართლის აცილებასთან დაკავშირებით შუამდგომლობა გვქონდა იმ მოტივით, რომ ჩვენ კანონით დადგენილი წესით არ გვეცნობა წინასასამართლო სხდომის გაგრძელების შუამდგომლობის შეტანის შესახებ და არ მოგვეცა შესაძლებლობა, 3 დღიან ვადაში ჩვენი მოსაზრება დაგვეფიქსირებინა. სასამართლომ მიიჩნია, რომ ჩვენი შუამდგომლობა უსაფუძვლოა, რადგან საქმეში ცალმხრივი ოქმი დევს, რომლის თანახმადაც, ადვოკატს დაუკავშირდა გამომძიებელი და აცნობა, რომ ისინი აპირებდნენ შუამდგომლობის შეტანას და არა ის, რომ შეიტანეს“, – განაცხადა ადვოკატმა.
ადვოკატი ითხოვს, რომ არჩილ გაგნიძეს აღკვეთის ღონისძიება პატიმრობა გირაოთი შეუცვალონ.
„ახლა ბრალდების მხარის შუამდგომლობის განხილვა მიმდინარეობს აღკვეთის ღონისძიების პატიმრობის ძალაში დატოვების შესახებ ჩვენ ვთხოვთ სასამართლოს რომ ჩვენი დაცვის ქვეშ მყოფი დარჩეს აღკვეთის ღონისძიების გარეშე, გაუქმდეს პატიმრობა, თუმცა ალტერნატივის სახით ვთავაზობთ სასამართლოს თუ ჩათვლის საჭიროდ დარჩეს, რომელიმე აღკვეთის ღონისძიება რომ 5000 ლარიან გირაოს“, – ამბობს ადვოკატი.
დღეს ფეხბურთელ გიორგი შაქარაშვილის საქმეზე დაკავებული 17 პირიდან 11-ის სასამართლო პროცესი იმართება. აღნიშნულ სხდომაზე დაკავებული 11 პირის მიმართ შეფარდებული აღკვეთის ღონისძიება – პატიმრობა გადაისინჯება.
მაისურები “შაქარას” ფოტოთი – სასამართლო პროცესზე გიორგი შაქარშვილის კლასელები მივიდნენ – VIDEO
