NATO-ს გენერალური მდივნის, იენს სტოლტენბერგის განცხადებით, NATO ყარაბაღის კონფლიქტში არ მონაწილეობს. ამის შესახებ მან სომხეთის პრეზიდენტთან გამართული შეხვედრის შემდეგ განაცხადა.

„სომხეთის პრეზიდენტს შევახსენე, რომ  NATO ამ კონფლიქტის ნაწილი არ არის. სომხეთიც და აზერბაიჯანიც 25 წელზე მეტი ხნის განმავლობაში NATO-ს ღირებული პარტნიორები არიან.

NATO შეშფოთებას გამოთქვამს ცეცხლის შეწყვეტის რეჟიმის დარღვევის გამო.

საომარი მოქმედებების შეწყვეტა მნიშვნელოვანია, როგორც ალიანსის, ასევე საერთაშორისო უსაფრთხოებისთვის. მნიშვნელოვანია, რომ ორივე მხარემ თავშეკავება გამოიჩინოს და ცეცხლის შეწყვეტის რეჟიმი დაიცვას. მშვიდობიან მოსახლეობაზე თავდასხმა მიუღებელია და უნდა შეწყდეს“, – განაცხადა სტოლტენბერგმა.

შეგახსენებთ, რომ სომხეთსა და აზერბაიჯანს შორის ურთიერთობა 27 სექტემბრიდან დაიძაბა.

9 ოქტომბერს აზერბაიჯანი და სომხეთი ცეცხლის შეწყვეტის შესახებ შეთანხმდნენ. რამდენიმე საათში მხარეებმა ერთმანეთი შეთანხმების დარღვევაში დაადანაშაულეს.

მათ შორის კიდევ ერთი სამშვიდობო შეთანხმება ძალაში 18 ოქტომბერს, ადგილობრივი დროით 00:00 საათზე შევიდა.

თუმცა, ის კვლავ დაირღვა და აზერბაიჯანი და სომხეთი ამაში კვლავ ერთმანეთს ადანაშაულებენ.