ჭყონდიდის მიტროპოლიტი, მეუფე სტეფანე ურჩობაში მყოფ იღუმენ დანიელს გვილავას ბოლო გაფრთხილებას აძლევს.
შესაბამისი ბრძანება ჭყონდიდის ეპარქიის გვერდზე გამოქვეყნდა.
მას უპასუხეს სალხინოსა და წაჩხუროს ტაძრების სასულიერო პირთა ნაწილმა.
„თქვენი წმინდა ტრაპეზთან მიახლოება სასჯელია თქვენთვის ცრუ მიტროპოლიტო სტეფანე….
ყველა სიტყვა მცდარია ამ ბრძანებაში, მამა დანიელის განკვეთა თქვენს უმსგავსო საქციელს კიდევ უფრო უმსგავსოს გახდის…
მარტვილში ადამიანების სულის საცხონებლად არაფერს აკეთებთ. პირიქით, სული დაგვიმძიმეთ მრევლს და სულ რაღაც 3 თვეში ეპარქია განადგურების პირას მიიყვანეთ…
რა პასუხს გასცემთ მრევლს და ღვთის წინაშე როგორი პირნათელი წარსდგებით ცრუ მეუფეო…“,-ამბობენ ისინი.
შეგახსენებთ, ჭყონდიდის ეპარქიაში დაპირისპირება გრძელდება.
მიტროპოლიტმა სტეფანემ სალხინოს მამათა მონასტერში მყოფი სასულიერო პირები რეზიდენციის გადაბარების პროცესის ხელისშეშლაში დაადანაშაულა.
ეპარქიის სასულიერო პირების ნაწილის თქმით, რეზიდენციის აღწერის პროცესის წინააღმდეგნი არ არიან, თუმცა მეუფეს ობიექტებზე ზედამხედველობას ვერ ანდობენ.
საუბარია სალხინოს რეზიდენციის ღვინის სახლზე, მარანზე, ასევე დადიანების სასახლესა და მოურავის სახლზე.
ავტორი: თეა შონია
