პარტია “მოქალაქეების” ერთ-ერთი ლიდერი, ალეკო ელისაშვილი გავრცელებულ ინფორმაციას, რომ მას ფარული კადრებით აშანტაჟებენ, ცილისწამებას უწოდებს.
„ჩვენ ვმოქმედებთ სახელმწიფოს ინტერესებით, ხალხის ინტერესებით და ჩვენი სინდისის კარნახით. რასაც თვითონ არიან მიჩვეულები, რომ ერთმანეთს აშანტაჟებდნენ, სულ გარიგებებში მონაწილეობდნენ, სულ ფულს იღებდნენ, ჰგონიათ, რომ ყველა ასე ცხოვრობს. რუსული გამოთქმა რომ არის, ყველა თავისი გარყვნილების მიხედვით ზომავს სხვასო, ჩვენ მაგ საზომებით არ გვიცხოვრია. სხვანაირად ვცხოვრობდით, სხვანაირი მიზნები გვაქვს პოლიტიკაში და ამ მიზნებს ვემსახურებით – ეს არის ქვეყნის და ხალხის სამსახური და ჩვენი სინდისის კარნახი. დანარჩენი, რომ ვერ ჩამოყალიბებულან, იმ თავგზააბნეულმა ხალხმა, ვისაც რა ჭუჭყი მოსდის თავში, ერთმანეთს უზიარონ“, – განაცხადა ელისაშვილმა.
შეგახსენებთ, რომ მას შემდეგ, რაც ალეკო ელისაშვილმა “ნაციონალურ მოძრაობას” გიორგი ვაშაძის შანტაჟში დასდო ბრალი, ჟურნალისტმა ელისო კილაძემ სოციალურ ქსელში დაწერა, რომ თუ ელისაშვილი არ შეწყვეტს “ჭორაობას” თავად მოყვება ვინ აშანტაჟებდა მას ფარული კადრებით.
