თბილისში კორონავირუსით ინფიცირებულთა კლასტერი ფართოვდება – ვირუსი დღეს „ქართული ოცნების“ სათაო ოფისში დასაქმებულ პირთან კონტაქტში მყოფ 5 პირს დაუდასტურდა. ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.
არსებობს თუ არა თბილისში რეგულაციების გამკაცრების საფრთხე – საკითხზე ინფექციონისტი ირაკლი ხმალაძე საუბრობს.
როგორც მან „პრაიმტაიმთან“ საუბრისას განაცხადა, იმ შემთხვევაში, თუ თბილისში ინფიცირებულთა რაოდენობა ყოველდღიურად მოიმატებს, მაშინ საქართველოს დედაქალაქში კარანტინი გამოცხადდება.
“თბილისში რეგულაციები მხოლოდ მაშინ გამკაცრდება, თუ იმაზე მეტი იქნება დაავადებული, ვიდრე ქართულ სამედიცინო სისტემას შესაძლებლობა ექნება, რომ დაავადებულებს დახმარება გაუწიოს.
როდესაც სამედიცინო სამსახური ინფიცირებულთა რაოდენობას უმკლავდება, საშიში არაფერია. იმ შემთხვევაში, თუ ინფიცირებულთა რაოდენობის მომატება ნახტომისებურად დაიწყო, მაშინ აუცილებელი იქნება თბილისის ჩაკეტვა და სხვა რადიკალური ზომების გატარება.
ყოველ დღე თუ ინფიცირების სამი, ოთხი შემთხვევა გამოვლინდა, არაუშავს. ასევე, მთავარია, რომ დაავადების მძიმე ფორმები არ დაფიქსირდეს. ვირუსმა მთელი თავისი ძალაუფლება უნდა არ უნდა გამოავლინოს“,- განაცხადა ხმალაძემ.
კითხვაზე, შეინიშნება თუ არა საქართველოში ვირუსის გავრცელების უცნაური ტენდენცია, ხმალაძე გვპასუხობს:
“საქართველოში კორონავირუსის გავრცელების უცნაური ტენდენცია ნამდვილად შეინიშნება, ეს იმაზე მიანიშნებს, რომ ჯანმრთელ ადამიანებში ვირუსის უსიმპტომო ფორმები მიმდინარეობს, თუმცა ეს მოსაზრება კვლევებით დადასტურებული არ არის”,- განაცხადა ხმალაძემ.
ინფორმაციისთვის, დღეს კორონავირუსით ინფიცირების 18 ახალი შემთხვევა გამოვლინდა. მათგან ხუთი თბილისში დაინფიცირდა. ჯამში ინფიცირებულთა რაოდენობა 1487-ს შეადგენს, გამოჯანმრთელებულია 1240 ადამიანი.
ავტორი: ეკატერინე ზარნაძე
