თბილისსა და რუსთავში, შინაგან საქმეთა სამინისტროს ბინათმშენებლობის პროექტი, რომელიც საცხოვრებელი კორპუსების მშენებლობას გულისხმოს, დასრულდა. ამის შესახებ ინფორმაციას შსს ავრცელებს.
წყაროს მიხედვით, შინაგან საქმეთა მინისტრის მოადგილემ – გიორგი ბუთხუზმა, თბილისში, გლდანის რაიონში, ახლად აშენებულ კორპუსში ბინების მფლობელ პოლიციელებს მშენებლობის დასრულება მიულოცა და ბინის გასაღები გადასცა.
“ამ ეტაპზე, ბინები საკუთრებაში გადაეცა თბილისში – 83 პოლიციელს და რუსთავში – 56 პოლიციელს.
ბინათმშენებლობის პროექტი თბილისში, რუსთავსა და ბათუმში განხორციელდა. პროექტის ფარგლებში, სამინისტროს თანამშრომლებს შესაძლებლობა მიეცათ, შეღავათიან პირობებში მიეღოთ თანამედროვე სტანდარტების შესაბამისი ბინები. პროექტის მიხედვით, პოლიციელებს სახელმწიფო უფინანსებს მშენებლობის ღირებულების 40%-ს, ხოლო დარჩენილ 60%-ს საკუთარი სახსრებით ან იპოთეკური სესხით ფარავენ. პროექტში მონაწილე ყველა პირი 77,4 კვ.მ ფართობის მქონე საცხოვრებელ ბინას „თეთრი კარკასის“ მდგომარეობით იღებს.
ყველა ახალაშენებულ კორპუსს აქვს შიდა და გარე საერთო სარგებლობის ავტოსადგომი და გამწვანებული გარე პერიმეტრი” – წერია განცხადებაში.
ხაზგასასმელია ისიც, რომ აღნიშნული პროექტით შეღავათიან ფასებში ბინის შეძენის მსურველები შსს-ს მინისტრის – ვახტანგ გომელაურის ბრძანებით შექმნილმა კომისიამ შეარჩია. წყაროს ინფორმაციით, არჩეულ კანდიდატებს შორის გამარჯვებულები ლოტოტრონის პრინციპით შეირჩა.
