„თვლაც არ იციან. მათთვის მეორე ტალღის მერე იწყება პირველი ტალღა. იმის მაგივრად, რომ მომზადებულიყვნენ, ნახეთ რამხელა რიგებია, სად არის უფასო ტესტები?“,- ამის შესახებ საქართველოს მესამე პრეზიდენტმა, მიხეილ სააკაშვილმა საჩხერეში, მაჟორიტარობის წარდგენის დროს ისაუბრა.
როგორც იგი ამბობს, ხელისუფლება მომზადებული არ შეხვდა პანდემიას და ახლა გარდაცვალებას სხვადასხვა მიზეზით ხსნიან.
„მათ ტყუილებს და შეცდომებს აქვთ ადამიანური ფასი. ყოველდღე პანტა პუნტით გვეხოცება ხალხი ახალი ვირუსისგან. ეს იმიტომ, რომ მათ ჯერ კიდევ ივნისში გამოაცხადეს, რომ საქართველოში დაიწყო მეორე ტალღა. დღეს იგივე კაცი ამბობს, რომ პირველი ტალღა იწყება საქართველოში. თვლაც არ იციან. მათთვის მეორე ტალღის მერე იწყება პირველი ტალღა. იმის მაგივრად, რომ მომზადებულიყვნენ, ნახეთ რამხელა რიგებია, სად არის უფასო ტესტები? მთელი ფული თქვენი ჯიბიდან დახარჯა გახარიამ, ივანიშვილის ძმამ და ყველა სხვამ სასტუმროებზე და თავის ნათესავებზე.
და მერე მოხდაო ? კიდევ დაგვცინიან და ზემოდან ქვემოთ გვიყურებენ. მერე რა მოხდაო ერთ-ერთი მუშკეტერი ამბობს. ხალხი იხოცება იმიტომ რომ ზოგს მუხლი სტკიოდაო, ზოგს წნევა უწევდაო, ზოგს შაქარი ჰქონდა აწეულიო. უკაცრავად? თუ წნევა გვიწევს, ეს არის საფუძველი იმის, რომ დავხოცოთ? იმის გამო რომ თქვენ ფული მოიპარეთ?“,- აღნიშნა სააკაშვილმა.
ცნობისთვის, გუშინ პაატა იმნაძემ განაცხადა, რომ ჩვენთან ახლა ვირუსის პირველი ტალღაა. მისივე განმარტებით, რეალურად ჩვენ ახლა გვაქვს ის პირველი ტალღა, რომელიც მთელ მსოფლიოში იყო გაზაფხულზე.
