პარლამენტის საპროცედურო საკითხთა კომიტეტის თავმჯდომარის პირველი მოადგილე, გურამ მაჭრაშვილი მიხეილ სააკაშვილის უკრაინის ელჩთან დაკავშირებულ განცხადებას ეხმაურება.
მაჭარაშვილი იმედს გამოთქვამს, რომ უკრაინის ხელისუფლება მიხეილ სააკაშვილს „თავის ადგილს მიუჩენს“.
„კარგია, რომ უკრაინის საგარეო უწყებამ მას მოუწოდა, რომ ასეთი სახის განცხადებებიდან თავი შეიკავოს, მაგრამ ცუდია, რომ ეს ადამიანი იყო საქართველოს პრეზიდენტი და უკრაინის ხელისუფლებას მისთვის ჭკუის დარიგება უწევს იმ ადამიანის მიმართ, ვისაც დღეს პრეტენზია აქვს, რომ საქართველოს ხელისუფლებაში მოვიდეს. პარტნიორი ქვეყნები ხედავენ, რომ საქართველოში დემოკრატიული პროცესები მიმდინარეობს და არც სხვა ქვეყნის და არც უკრაინის მოქალაქეს უფლება არ აქვს, საქართველოში მიმდინარე პოლიტიკურ პროცესებში ჩაერთოს და მითუმეტეს, დაუმორჩილებლობისკენ მოწოდებები ჰქონდეს.
უკრაინასთან მჭიდრო, მეგობრული ურთიერთობა გვაქვს, დარწმუნებული ვართ, რომ ეს ასე გაგრძელდება და მიხეილ სააკაშვილი ვერ შეძლებს, ამ ურთიერთობებს ოდნავ მაინც ზიანი მიაყენოს. დარწმუნებული ვართ იმაში, რომ უკრაინის ხელისუფლება მოახერხებს, რომ ჩვენი ურთიერთობები გაგრძელდება და მიხეილ სააკაშვილს თავის ადგილს მიუჩენს”, – განაცხადა მაჭარაშვილმა.
ცნობისთვის, საქართველოს ყოფილმა პრეზიდენტმა, მიხეილ სააკაშვილმა საქართველოში უკრაინის ელჩ იგორ დოლგოვს კორუმპირებული უწოდა.
ასევე, დაგაინტერესებთ: უკრაინის საგარეო უწყება მიხეილ სააკაშვილის განცხადებას შიდა საქმეებში ჩარევად მიიჩნევს – ოფიციალური განცხადება
