დედაქალაქის მერის, კახა კალაძის განმარტებით, ერთ დღეში სულ 1 552 მგზავრი შეეცადა ტრანსპორტში პირბადის გარეშე ასულიყო. ასევე 2 შემთხვევაზე პოლიციის გამოძახება გახდა საჭირო. ამის შესახებ კალაძემ დედაქალაქის მთავრობის სხდომაზე განაცხადა.

„გუშინ 1489 მგზავრი შეეცადა ავტობუსში ასვლას. ასევე 1567 მგზავრს მიეცა გაფრთხილება იმის შესახებ, რომ არასწორად ეკეთათ პირბადე, რაც ასევე პრობლემას წარმოადგენს. მოხდა საპატრული პოლიციის გამოძახება 2 შემთხვევაში,

ასევე, მიკროავტობუსში 63 მოქალაქეს ჰქონდა მცდელობა ემგზავრა პირბადის გარეშე. გამოვლინდა ასევე ფეხზე მდგომითი მგზავრების სამი შემთხვევა, კონკრეტული მიკროავტობუსების მძღოლებს ორი დღით აეკრძალათ მუშაობა. მე მინდა ვთხოვო ადამიანებს, ვინც ტრანსპორტს იყენებს, რომ პირბადის ტარება არის აუცილებელი იმისთვის, რომ დავიცვათ საკუთარი თავი და სხვა ადამიანები“,- განაცხადა კახა კალაძემ.

ცნობისთვის, დღეიდან პირბადის ტარება ღია სივრცეშიც სავალდებულო გახდა.