ჯანდაცვის მინისტრის მოადგილის, თამარ გაბუნიას განმარტებით, ვაქცინაციის გაკეთებამდე ადამიანს კორონავირუსის ანტისხეულებზე ტესტი არ უკეთდება. ამის შესახებ თამარ გაბუნიამ ჯანდაცვის სამინისტროში ბრიფინგზე განაცხადა.
„სპეციალური გამოკვლევა ანტისხეულებით, ან აცრის წინ ტესტირება იმაზე ადამიანს აქვს თუ არა კორონავირუსი, თუ მას სიმპტომები არ აღენიშნება, არ ხდება და არც ერთი ქვეყანა და არც ერთი პროტოკოლი ამას არ მიუთითებს. ანამნეზურად ხდება ამ ინფორმაციის გამოკითხვა და ასევე სისტემას აქვს ვალიდაციის საშუალება დადასტურებული კოვიდიდან 120 დღის შემდეგ აჩვენოს.
ამასთან, უსიმპტომო გადატანის შემთხვევებზე და ასეთ თეორიულ სცენარებზე დღეს ვაქცინაციის ჩატარების ან არჩატარების შესახებ,სამწუხაროდ, რეკომენდაცია არ არსებობს“,- განაცხადა თამარ გაბუნიამ.
შეგახსნებთ, 27 წლის ექთანი, რომელსაც გუშინ, -„ასტრაზენეკას“ ვაქცინის გაკეთების შემდეგ სავარაუდოდ, გვერდითი რეაქცია – ანაფილაქსიური შოკი დაუდასტურდა, გარდაიცვალა.
გუშინვე, ცნობილი გახდა, რომ საქართველო „ასტრაზენეკათი“ ვაქცინაციას გააგრძელებს. გადაწყვეტილება ექსპერტთა ჯგუფმა ჯანდაცვის სამინისტროში გამართული შეხვედრის შემდეგ მიიღო.
