ანტისხეულებზე კვლევის შედეგები იქნება დაახლოებით 2 კვირაში, – ამის შესახებ ინფექციური საავადმყოფოს დირექტორმა, თენგიზ ცერცვაძემ განაცხადა.

მისი თქმით, 2 კვირაში გახდება ცნობილი, რამდენ ადამიანს  აქვს გადატანილი კოვიდი, ისე, რომ მან არ იცოდა, რომ გადაიტანა

„ანტისხეულებზე კვლევის შედეგები იქნება დაახლოებით 2 კვირაში. ჩვენ ვიკვლევთ ანტისხეულებს იმ ადამიანებში, შემთხვევითი შერჩევის პრინციპით, ვისაც არ გადაუტანია კოვიდი, ყოველ შემთხვევაში არ იცის გადატანილი აქვს თუ არა. ბევრ მათგანს გადატანილი აქვს ასიმპტომურად და ვავლენთ, მოსახლეობის რა პროცენტს აქვს ანტისხეულები ისე, რომ მან არ იცოდა, რომ გადაიტანა კოვიდი. ეს რატომ არის მნიშვნელოვანი იცით?! ჩვენ ხომ ვამბობთ, რომ წლის ბოლომდე უნდა მოვახდინოთ მოსახლეობის 60-65%-ის ვაქცინაცია, სინამდვილეში, 60% არ არის საკმარისი, 80%-ია საჭირო, მაგრამ ჩვენ ვვარაუდობთ, რომ 15% -ს გადატანილი ექნება და ისინი დაემატება იმ 65%-ს. რამდენს აქვს გადატანილი, 2 კვირაში გვეცოდინება.“, – განაცხადა ცერცვაძემ.

ცნობისთვის, ანტისხეულებზე კვლევასთან ერთად მიმდინარეობს პოსტკოვიდური სინდრომის კვლევა.