„ლეიბორისტული პარტიის“ ლიდერი შალვა ნათელაშვილი აცხადებს, რომ დავით ჭაკუა გერმანიის მთავრობამ საქართველოს წინასაარჩევნოდ საჩუქარად გადასცა.
ნათელაშვილი ამბობს, რომ დავით ჭაკუა შესანიშნავად ცხოვრობდა გერმანიაში და არავინ ითხოვდა გადმოცემას, მისი ექსტრადირება კი, წინასაარჩევნო პერიოდს დაამთხვიეს.
„ჩემი აზრით, ბატონი ჭაკუა გერმანიის ხელისუფლებამ საქართველოში გერმანიის ელჩის დიდი რუდუნებით, წინასაარჩევნო საჩუქრად გამოუგზავნა ბიძინა ივანიშვილს, რათა შექმნან შთაბეჭდილება, რომ ეს ბატონი ებრძვის დამნაშავეებს, მოძალადეებს. აღნიშნული პატიმარი შესანიშნავად ცხოვრობდა გერმანიაში, არავინ არ ითხოვდა მის გადმოცემას და დაამთხვიეს წინასაარჩევნო პერიოდს“, – განაცხადა შალვა ნათელაშვილმა.
შეგახსენებთ, რომ საქართველოს პროკურატურის შუამდგომლობით, გერმანიიდან სასჯელაღსრულების დეპარტამენტის ყოფილი თავმჯდომარის დავით ჭაკუას ექსტრადიცია განხორციელდა.
ცნობისთვის: არაერთ მძიმე დანაშაულში ბრალდებული – დავით ჭაკუა ინტერპოლის წითელი ცირკულარით 2013 წლის 23 მარტიდან იძებნებოდა.
44 წლის დავით ჭაკუას ბაჩო ახალაიასთან, რეზო ჭარბაძესა და მეგის ქარდავასთან ერთად ბრალად ედება 2006 წლის 27 მარტს, თბილისში ციხის ბუნტის პროვოცირებაში, რასაც შვიდი პატიმრის სიცოცხლე შეეწირა.
გარდა ამისა, იუსტიციის ყოფილ მინისტრ ზურაბ ადეიშვილთან ერთად, ჭაკუას მხილებულია პატიმართა მიმართ დამამცირებელი და არაადამიანური მოპყრობის ორგანიზებაში, სამსახურებრივი უფლებამოსილების ბოროტად გამოყენებაში, სისხლის სამართლის საქმეზე მტკიცებულების ფალსიფიკაციასა და მოწმეზე ძალადობაში.
პროკურატურა ამტკიცებს, რომ 2012 წლის 17 სექტემბერს ზურაბ ადეიშვილმა ციხის სკანდალური კადრების გავრცელებამდე, სწორედ ჭაკუას დაავალა გლდანის ციხეში წინასწარ შერჩეული პატიმრების მიმართ დამცირების, წამების, ცემისა და სიტყვიერი შეურაცხყოფის ორგანიზება და ამ ფაქტის ვიდეოგადაღება, რათა სკანდალური კადრების მოსალოდენლ გავრცელებამდე საზოგადოებას შექმნოდა აზრი, რომ ისინი დაკვეთით იყო გადაღებული.
Exclusive: წამებისთვის ძებნილი ყოფილი მაღალჩინოსანი დავით ჭაკუა გერმანიამ საქართველოს გადმოსცა
