მეგი ბაქრაძის ოჯახის ადვოკატის, ნინო ამაღლობელის განცხადებით, დღევანდელი პროკურატურის გადაწყვეტილება მათთვის მოსალოდნელი იყო.
როგორც ის „პრაიმტაიმთან“ საუბრისას აცხადებს, ორ ექთანსა და ერთ ექიმზე ბრალის წარდგენა მთავარ კითხვას – რამ გამოიწვია მეგი ბაქრაძის სიკვდილი, პასუხს არ სცემს.
„რაც დღეს მოხდა, მოსალოდნელი იყო. მოწმეთა შეცვლილი ჩვენებები და ის, რომ პროტოკოლი დაირღვა, ყველაფერი იყო საქმის მასალებში, რაზეც ჩვენ ვსაუბრობდით, მაგრამ დეტალებზე არ ვამახვილებდით ყურადღებას. თავიდან ყველა მოწმე აძლევს იდენტურ ჩვენებას და შემდგომ უკვე ჩვენებები ირევა და ორდღიან შუალედში ყველა მოწმე ცვლის ჩვენებას, საუბრობენ ახალ გარემოებებზე, რომელიც ადასტურებს დანაშაულს. ამ პირებისთვის ბრალის წარდგენა ჩვენთვის და ოჯახისთვის არცერთ კითხვაზე პასუხს არ სცემს. ამით ოჯახი, ადვოკატები არ გავჩერდებით. ვითხოვთ, 18 მარტის მოვლენებზე პასუხის გაცემას და გაგებას, რა გახდა გარდაცვალების მიზეზი. ჩეცვლილი ჩვენებები ჩვენ არ გვაინტერესებს,“ – განუცხადა „პრაიმტაიმს“ ნინო ამაღლობელმა.
ცნობისთის, საქართველოს პროკურატურამ მეგი ბაქრაძის გარდაცვალების საქმეზე, გამოძიებისთვის ცრუ ინფორმაციის მიწოდების ფაქტზე „ახალციხის კლინიკა იმედის“ ორ ექიმსა და ექთანს ბრალი წარუდგინა.
