გუშინ იყო ძალიან მნიშვნელოვანი დღე და დიდი მადლობა ჩვენს დასავლელ პარტნიორებს. რომ არა მათი ესეთი ჩართულობა, იძულება შეთანხმებისკენ, ალბათ შეთანხება ვერ იქნებოდა, – ამის შესახებ “სტრატეგია აღმაშენებლის” ლიდერმა, გიორგი ვაშაძემ განაცხადა.
ვაშაძე ურჩევს კოლეგებს, დოკუმენტს კარგად გაეცნონ, წაიკითხონ და ამის შემდეგ გამოთქვან კრიტიკული მოსაზრებები.
“გუშინ იყო ძალიან მნიშვნელოვანი დღე და დიდი მადლობა ჩვენს დასავლელ პარტნიორებს. რომ არა მათი ესეთი ჩართულობა, იძულება შეთანხმებისკენ, ალბათ შეთანხება ვერ იქნებოდა. ჩვენ გუშინ დავამტკიცეთ, რომ ვართ დასავლური ცივილიზაცია და ჩვენი გზა არის ევროკავშირი და დღეს შარლ მიშელის ჩამოსვლა ხაზს უსვამს, რომ ევროპა ელოდება საქართველოს როგორც სრულუფლებიან წევრს ევროკავშირში. ამის ფუნდამენტი, ჩემი აზრით, ჩადებულია იმ დოკუმენტში, რომელსაც ჩვენ ხელი მოვაწერეთ, რომელშიც ძალიან ბევრი ცვლილება და რეფორმაა გათვალისწინებული, მაგრამ მივმართავ ყველას ჩემს კოლეგას სხვადასხვა პარტიიდან, ნუ დავაზიანებთ საერთო მიღწევას, რომელიც გვაქვს. ყველას არ მიგვიღია ყველაფერი რაც გვინდოდა, მაგრამ ვფიქრობ, რომ ობიექტურად კომპრომისული წინადადებები მივიღეთ და ვისაც სწორად შეუძლია სიტუაციის შეფასება, ნამდვილად ასეა. ნუ დავამახინჯებთ შინაარსს, თუ არ წაგვიკითხავს, ჯერ წავიკითხოთ კარგად ეს დოკუმენტი და მერე გამოვთქვათ გარკვეული მოსაზრებები ამა თუ იმ პუნქტთან დაკავშირებით.
დღეს ჩამოდის შარლ მიშელი და ძალიან კარგი იქნება ყველამ მის ჩამოსვლამდე მოაწეროს ხელი ამ დოკუმენტს. ყველა ამ პოლიტიკურ ძალას და პიროვნებებს დარწმუნებული ვარ, მაინც ვიხილავთ პარლამენტში, მოაწერენ დღეს ხელს თუ არა,“ – ამბობს გიორგი ვაშაძე.
