აჭარის მთავრობის თავმჯდომარე თორნიკე რიჟვაძემ ხელვაჩაურის მუნიციპალიტეტის სოფელ ქვედა ჯოჭოში ტრაგიკულად დაღუპული ოჯახის ნათესავებსა და ახლობლებს მიუსამძიმრა და განაცხადა, რომ მნიშვნელოვანია ოჯახის ხსოვნას კიდევ უფრო მეტი პატივი მივაგოთ გადარჩენილი გოგონას სახით და მას სახელმწიფოსგან აბსოლუტური თანადგომა ექნება.
„უმძიმესი ორი დღე იყო ყველასთვის. რა თქმა უნდა, კიდევ ერთხელ მინდა მივუსამძიმრო განსაკუთრებით ხელვაჩაურს, დაღუპულების ოჯახს და მთელს ქვეყანას. მინდა, ასევე დიდი მადლობა გადავუხადო ჩვენს მაშველებს, რომლებმაც შეუძლებელი შეძლეს და იპოვეს ყველა დაკარგული ადამიანი.
ეს იყო უეცრად უხვი ნალექის შედეგად განვითარებული სტიქიური მოვლენები. რაც შეეხება წინა ისტორიებს, თუკი არსებობდა კონკრეტული რეაგირების გარეშე დარჩენილი შემთხვევები, როგორც უკვე განვმარტე დეტალური შესწავლის შემდეგ, ასეთის არსებობის შემთხვევაში, მოხდება უმკაცრესი რეაგირება. ამ შემთხვევით ყველამ უნდა გავაკეთოთ დასკვნა, რომ ესეთი შემთხვევები აღარ განმეორდეს.
განსაკუთრებით მნიშვნელოვანი იქნება ჩვენთვის, რომ ოჯახის ხსოვნას კიდევ უფრო მეტი პატივი ვცეთ გადარჩენილი გოგონას სახით, რომელიც დარჩათ და ამისთვის ყველაფერს გავაკეთებ, რომ მას ექნება აბსოლუტური გვერდში დგომა სახელმწიფოსგან და თითოეული ჩვენგანის მხრიდან”- განაცხადა თორნიკე რიჟვაძემ.
შეგახსენებთ, 1-ლ ოქტომბერს ქვედა ჯოჭოში განვითარებული მოვლენების დროს, ერთი ოჯახის სამი წევრი, მათ შორის არასრულწლოვანი დაიღუპა. აღნიშნული ოჯახის მეორე არასრულწლოვანი შვილი შემთხვევის დროს, სახლში არ იმყოფებიდა. ის ბებიასთან ხულოში სტუმრად იყო.
