„მნიშვნელოვანია, რომ არა დაბალ დონეზე დარჩეს პასუხისმგებლობა თუ არსებობს, არამედ მთავარი პასუხისმგებელი ასეთი დანაშაულების შემთხვევაში, არის მაღალი რანგის თანამდებობის პირი“- ასე ეხმაურება „ქართული ოცნების“ აღმასრულებელი მდივანი ირაკლი კობახიძე კარტოგრაფების საქმეს. კობახიძე საუბრობს, რომ მსგავსი დანაშაულები დაბალ დონეზე ვერ იქნება ჩადენილი და მას მომზადება და აღსრულება სჭირდება.
„სავარაუდო დანაშაულზეა საუბარი. ჩვენ ვიცავთ უდანაშაულობის პრეზუმფციას. ასეთი სავარაუდო დანაშაულები ვერ იქნება ჩადენილი დაბალ დონეზე. ამ ეჭვს თავისი საფუძველი აქვს, თუმცა ეს არის ეჭვი. ჩვენთვის მთავარია, დაველოდოთ სამართალდამცავი ორგანოების პოზიციას. მთავარია ამ საკითხის მოგვარება ჩვენს აზერბაიჯანელ მეგობრებთან ერთად. ეს არის ჩვენი მთავარი ამოცანა.
საეჭვო პოლიტიზება ამ საქმის მიუთითებს იმაზე, რომ როგორც ჩანს, იმაზე მეტი იმალება, ვიდრე შეიძლება ერთი შეხედვით ჩანდეს. არ ვიცი, რა მოტივი ჰქონდა ,,ნაციონალურ მოძრაობას“ თავის დროზე, როცა შემოხაზა სამხრეთ ოსეთის ავტონომიური ოლქის საზღვრები, რამაც რუსეთის ფედერაციას გაუადვილა ოკუპაცია, ბორდერიზაცია, რომელიც დღემდე წარიმართება. რა მოტივაცია უნდა ჰქონოდათ ამ შემთხვევაშიც. ეს არის ერთადერთი რამის გამოვლინება, ამ ადამიანებს არ უყვარდათ საკუთარი ქვეყანა და საკუთარი სამშობლო. სხვა მოტივაციას მე ვერ ვხედავ.
ჩვენ ვიცავთ უდანაშაულობის პრეზუმფციას, თუ სახეზეა დანაშაული, ამ დანაშაულს სჭირდებოდა მომზადება და აღსრულება. მნიშვნელოვანია, რომ არა დაბალ დონეზე დარჩეს პასუხისმგებლობა თუ არსებობს, არამედ მთავარი პასუხისმგებელი ასეთი დანაშაულების შემთხვევაში, არის მაღალი რანგის თანამდებობის პირი. აქედან გამომდინარე, მნიშვნელოვანია, გაირკვეს, მაღალ დონეზე ვის ეკისრება პასუხისმგებლობა ასეთ უმძიმეს ქმედებაზე.
ერთ რამეს შეგახსენებთ, როდესაც აზერბაიჯანელი მესაზღვრეები გადმოვიდნენ იმ ტერიტორიაზე, რომელიც იყო კომისიაში დისკუსიის საგანი, ამას მოაყოლა „ნაცმოძრაობამ“ მთელი თავისი მედიით და თავისი ე.წ. ექსპერტებით შტურმი ,,ქართულ ოცნებაზე“ და ისინი საუბრობდნენ, რომ ,,ქართულმა ოცნებამ“ ეს დაუშვა და დღეს, როდესაც გაირკვა, რომ თურმე ეს ყოფილა იმ ადამიანების ბრალეულობა, რომლებიც ამ ყველაფერში მონაწილეობდნენ, ისინი პირიქით, ამ ადამიანებს ეფარებიან თავიდან ბოლომდე. მოდით, ორმაგი სტანდარტებით ნუ იხელმძღვანელებენ“- განაცხადა კობახიძემ.
