საფრანგეთის შინაგან საქმეთა მინისტრის, ჟერალდ დარმანენის განცხადებით, მოკლული მასწავლებლის მიმართ მუქარის შემცველი ვიდეოს გამოქვეყნების გამო, პანტენის კომუნაში მდებარე მეჩეთი დაიხურება. ინფორმაციას lefigaro ავრცელებს.
„სენ-სენ-დენის პრეფექტს პანტენის მეჩეთის დახურვის თხოვნით მივმართე. დღეს ეს მეჩეთი დაიხურება. პრეფექტი აღნიშნულ განკარგულებას ხელს მოაწერს“, – განაცხადა დარმანენმა.
შეგახსენებთ, პარასკევს, 16 ოქტომბერს პარიზის ერთ-ერთ გარეუბანში მდებარე სკოლის შენობასთან ისტორიის მასწავლებელი მოკლეს. ფრანგული მედიის ცნობით, მასწავლებელი გაკვეთილებზე მოსწავლეებს წინასწარმეტყველი მოჰამედის კარიკატურებს აჩვენებდა.
თავდამსხმელი მოსკოვში დაბადებული, წარმოშობით ჩეჩენი 18 წლის ახალგაზრდა იყო, რომელიც დაკავების დროს გაწეული წინააღმდეგობისას პოლიციამ მოკლა. პედაგოგის მკვლელობასთან დაკავშირებით სამართალდამცავებმა 11 პირი დააკავეს.
საფრანგეთში ათასობით ადამიანმა მოკლული მასწავლებლის მიმართ სოლიდარობის გამოსახატად დემონსტრაციები გამართა.
