გურჯაანის მუნიციპალიტეტის მერიას დაქვემდებარებულ უფასო სასადილოში 8 თანამშრომელი კორონავირუსით დაინფიცირდა.

შესაბამისი პერსონალის არარსებობის გამო, სასადილო დაკეტილია და ბენეფიციარები სასურსათო კალათას საცხოვრებელი ადგილების მიხედვით მიიღებენ.

გურჯაანის მუნიციპალიტეტის მერის მოადგილის, თემურ ზავრაშვილის განმარტებით, პერსონალის ვირუსით ინფიცირების გამო, მერიამ სამყოფი პროდუქტის განაწილება გადაწყვიტა.

„ვფიქრობდით, ბაგა-ბაღების გაერთიანებიდან მოგვეძიებინა პერსონალი, რომ სასადილო არ დაგვეკეტა, მაგრამ ვერ შევძელით. აქ ისეთი კატეგორია სადილობს, რომლებისთვისაც განსხვავებული კერძის მზადდება. ამიტომ ფინანსისტები ჩავრთეთ, გამოვნახეთ სახსრები და ყველა ბენეფიციარს, პროდუქტს სახლში მივუტანთ. 50 მოქალაქე, ისედაც ბინაზე იღებდა საკვებს და ხვალიდან ყველა ასე მიიღებს“,- განაცხადა ზავრაშვილმა.

უფასო სასადილოში კორონავირუსის გავრცელების წყარო, შეფ-მზარეული გახდა, რომელსაც ვირუსი, ათი დღის წინ დაუდასტურდა.

უფასო კვებით, გურჯაანში 200 ბენეფიციარი სარგებლობს. არც ერთ მათგანს, კორონავირუსი არ აღმოაჩნდა. სასადილო, დაახლოებით, ორი კვირის მანძილზე იქნება დაკეტილი.

ავტორი: ხათუნა გულიაშვილი