„რადიკალურ ოპოზიციას აქვს მთავარი ლოზუნგი – არჩევნებში სანამ ჩვენ არ გავიმარჯვებთ, ის არ არის დემოკრატიული“, – ამის შესახებ საქართველოს პარლამენტის თავმჯდომარემ ჟურნალისტებთან საუბრისას განაცხადა.
არჩილ თალაკვაძე ქვეყანაში მიმდინარე საპროტესტო აქციებსაც ეხმაურება და ამბობს, რომ თუ ვინმეს პროტესტის სურვილი ექნება, ეს მან კანონის ფარგლებში უნდა განახორციელოს.
მისივე შეფასებით, არჩევნების შედეგებზე თავდასხმა რუსეთის ფედერაციის ინტერესებში შედის.
„ისინი ამბობენ, რომ თუ არჩევნებში ისინი არ გაიმარჯვებენ, ისე ეს არ არის დემოკრატიული. რა თქმა უნდა, ასეთ მიდგომა აბსოლუტურად გაუმართლებელია. გუშინ ჩვენ ვნახეთ ცესკო-სთან საპროტესტო აქცია, სადაც მოქალაქეები ქვებს ურტყამდნენ ცესკო-ს წინ აღმართულ კარს. ნებისმიერ შემთხვევაში, ჩვენ არავის მივცემთ საშუალებას და ხელისუფლება არ დაუშვებს დემოკრატიაზე თავდასხმას. საქართველოში გადაწყვეტილებებს საზოგადოება იღებს მხოლოდ არჩევნების გზით. თუ ვინმეს აქვს პროტესტის სურვილი, სურს თავისი მოსაზრება გამოთქვას, ამისთვის არსებობს კანონმდებლობით დადგენილი ფარგლები და მას ვერავინ გასცდება. დემოკრატიაზე თავდასხმა, არჩევნების შედეგებზე თავდასხმა, ეს არის პირველ რიგში რუსეთის ინტერესებში და საზოგადოებას კიდევ ერთხელ ვთხოვ, დაფიქრდეს ამაზე, თუ რას ემსახურებიან ის რადიკალური პარტიები, რომლებიც ამ სცენარს უწევენ მხარდაჭერას“, – აცხადებს თალაკვაძე.
