აჭარის მთავრობის სახლთან მიმდინარე აქციაზე მცირე დაპირისპირება საქართველოს პარლამენტში “ერთიანი ნაციონალური მოძრაობის” ქობულეთის მაჟორიტარი დეპუტატობის კანდიდატს, ბონდო თედორაძესა და პოლიციას შორის მოხდა.
როგორც ბონდო თედორაძე აცხადებს, საპატრულო პოლიციის თანამშრომელი აქციის მონაწილეებს ფოტოებს ჩუმად უღებდა .
“ეს იმას ნიშნავს, რომ ისინი ირიბად ახდენენ ზემოქმედებას აქციის მონაწილეებზე, რომ შეშინდნენ აქციის მონაწილეები და უარი თქვან ხვალ და ზეგ აქციაში მონაწილეობაზე.
პოლიციელებზე ეს დავალება არის სრული მარაზმი და ნიშნავს, რომ საპატრულო პოლიცია პოლიტიკურ დაკვეთებს ასრულებს და ივანიშვილის მონა-მორჩილნი გახდნენ. ფარულად გადაღება არის დასჯადი. ათასჯერ მოვუწოდე, ნუ აკეთებენ ამ უკანონობას-მეთქი, არ გაითვალისწინეს. მოვუწოდე მათ ხმამაღლა, რაზეც შემოვიდნენ კონფლიქტში.
მინდა ვუთხრა მათ, ჩვენ კანონის ფარგლებში ვმოქმედებთ და არ ვაპირებთ პროვოკაციებს, ისინი ნუ წამოვლენ პროვოკაციაზე. მათ აცვიათ ფორმა და უფრო მეტი პასუხისმგებლობა აქვთ, რომ დაიცვან წესრიგი და სიმშვიდე”- აცხადებს ბონდო თედორაძე.
შეგახსენებთ, აჭარის მთავრობის სახლთან ცესკოს თავმჯდომარის გადადგომისა და ხელახალი არჩევნების ჩატარების მოთხოვნით გაერთიანებული ოპოზიცია აქციას მართავს.
ავტორი: ნაირა ქობულაძე
