„მიუხედავად პანდემიისა, ბიუჯეტი რომელიც შემოტანილია და დღეს მესამე მოსმენით კომიტეტზე განიხილება, პასუხობს მაქსიმალურად იმ ფინანსურ შესაძლებლობას რაც აქვს ჩვენს სახელმწიფოს უპასუხოს მთავარ გამოწვევებს.“,- ამის შესახებ უმრავლესობის წევრმა, ირაკლი ზარქუამ განაცხადა.

მისი თქმით, მთავარი პრიორიტეტი სოციალური საკითხები იქნება.

„მთავარი გამოწვევები ეს არის სოციალური მიმართულება, პენსიონერებისთვის პენსიის შენარჩუნება და მატება, იმ შშმ პირებისთვის და სოციალურად შეჭირვებული ცალკეული ჯგუფებისთვის, გარკვეული გაზრდილი პაკეტების შეთავაზება. გარდა ამისა, ჩვენთვის პრიორიტეტი არის ჩვენი მასწავლებლები, ჩვენი პოლიციელები და ყველა ის საჯარო სამსახურის თანამშრომელი ვინც ემსახურებიან საქართველოს.

შეგახსენებთ, რომ სახელმწიფო ბიუჯეტის მთლიანი ასიგნებები შეადგენს 18 მილიარდ 400 მილიონ ლარამდე, საიდანაც ერთ-ერთი მნიშვნელოვანი წილი სწორედ სოციალურ მიმართულებებს, დაახლოებით 5 მილიარდ 300 მილიონ ლარამდე შეადგენს. კითხვა თუ დაისმება, პასუხობს თუ არა მთავარ გამოწვევებს, დიახ სახელმწიფო ბიუჯეტი პასუხობს მაქსიმალურად მომავალი წლის გამოწვევებს. ყველა მიმართულებით როგორც შევძელით, გვაქვს ზრდა. პირველი პრიორიტეტი ეს არის სოციალური მიმართულებით და გვაქვს ზედა ეს არის 2020 წლის ბიუჯეტთან შედარებით, ისევე როგორც ეკონომიკის სამინისტროს მიმართულებით იმიტომ რომ ბიზნესი ძალიან მნიშვნელოვანია ჩვენთვის. თქვენ იცით, რომ ბიუჯეტი დაგეგმილია 4,3 რეალურ ეკონომიკურ ზრდაზე და თქვენი საშუალებით მინდა მადლობა ვუთხრა იმ ბიზნესების ჯგუფს, რომელთა დახმარებით ვცდილობთ რომ ბიუჯეტი შევავსოთ. ასე რომ ამ გამოწვევების მიუხედავად ბიუჯეტი პასუხობს მომავალი წლის გამოწვევებს“,- განაცხადა ირაკლი ზარქუამ.