უმრავლესობის წევრი, ირკალი ზარქუა ამბობს, რომ მისთვის საელჩოების განცხადება გაუგებარია.
როგორც ირაკლი ზარქუა ამბობს, მოსახლეობის გადაწყვეტილებაა, როგორი კონსტიტუცია იქნება ქვეყანაში.
„მთელი რიგი პუნქტებია, სადაც საუბარია საარჩევნო ბარიერის ორ პროცენტამდე დაწევაზე, შემდეგი ორი არჩევნების სრულად პროპორციული სისტემით ჩატარებაზე, ასევე ფრაქციების ოთხი ადამიანით შექმნაზე. ოპოზიციის რომელიმე ნაწილი ამ ცვლილებების წინააღმდეგი რომ ყოფილიყო, მხარს არ დაუჭერდა. მათთვის მნიშვნელოვანი არ იყო გენერალური პროკურორის არჩევის საკითხი, მათთვის პრიორიტეტი იყო ბარიერის არჩევა. დანარჩენი არის მცდელობა, რომ პროცესების დრამატიზება მოახდინონ. მოსახლეობის გადაწყვეტილებაა, როგორი კონსტიტუცია გვექნება.
მეგობრებს მადლობა რჩევისთვის, მაგრამ სადაც პრობლემა არ არის, იქ არ უნდა შევქმნათ. ამ ქვეყნის მომავალი უკავშირდება ევროკავშირს და ეს კონსტიტუციაში ავსახეთ. რადიკალურ ოპოზიციას სამი თვის განმავლობაში 19 აპრილის შეთანხმებაზე ხელი არ მოუწერია და სხვათა შორის, ცალკეული საელჩოების მხრიდან მათ მიმართ ასეთი მკაცრი განცხადებები არ მახსოვს, რაც ეკუთვნოდათ. როცა აქცენტი კეთდება გენერალური პროკურორის არჩევაზე კვალიფიციური უმრავლესობით, რაც უნდა შემდგარიყო 2026 წელს, ეს მგონია, რომ აცდენილია. ეს შეიძლება ვიღაცას ეწყინოს და ვიღაცას – არა. თუ მოლოდინი აქვთ საელჩოებს, რომ 2026 წელსაც ჩვენ ვიქნებით, მაშინ კი ბატონო, ჩვენც ასე გვჯერა და გვწამს, მაგრამ მაინც მგონია, რომ უსაფუძვლო იყო განცხადება, როცა ყველა პარტიის მხრიდან იყო კონსენსუსი“, – განაცხადა ზარქუამ.
აშშ-ს საელჩოს განცხადებით, პარლამენტის მიერ საკონსტიტუციო ცვლილების ჩაგდება, რომელიც მიზნად ისახავდა მთავარი პროკურორის დანიშვნისთვის მრავალპარტიულ მხარდაჭერას, კიდევ ერთი გაშვებული შესაძლებლობაა, საქართველოს ჰქონდეს დამოუკიდებელი, გამჭვირვალე და მიუკერძოებელი მართლმსაჯულების სისტემა.
