ბათუმის საქალაქო სასამართლომ ირაკლი ფანგანის აღმკვეთი ღონისძიების შეფარდების საკითხზე იმსჯელა. მოსამართლე ვიოლეტა ფორჩხიძემ აღმკვეთი ღონისძიების სახით ირაკლი ფანგანს 2000 ლარი გირაო შეუფარდა, გადახდის ვადად კი 40 დღე განუსაზღვრა.

ასევე დამატებითი ვალდებულებები დააკისრა სასამართლომ ირაკლი ფანგანს, რაც შემდეგში გამოიხატება, კვირაში ერთხელ გამომძიებელთან უნდა გამოცხადდეს. საქმის განხილვის დასრულებამდე აეკრძალაა ნებისმიერი სახის კომუნიკაცია და მიახლოება ირაკლი ჩავლეიშვილთან. ასევე საზღვრის გადაკვეთა.

„არ ვნანობ არაფერს. მაგრამ გავაგრძელებ ისევ, ძველებურად ვიაქტიურებ, აქციებშიც მივუღებ მონაწილეობას და ვიბრძოლებ ბოლომდე. პოზიცია არ შემიცვლია, ჩემი პოზიცია არის იგივე. მაგრამ, ვთქვი რომ მე თუ არა, სხვა გააკეთებს ანალოგიურს. სასამართლის გადაწყვეტილებას ვეთანხმები“, –  განაცხადა სასამართლო პრიცესის შემდეგ ირაკლი ფანგანმა.

წინასასამართლო სხდომა 16 თებერვალს 12 საათზე გაიმართება.

შეგახსენებთ, ირაკლი ფანგანის წინააღმდეგ გამოძიება სისხლის სამართლის კოდექსის 156-ე მუხლის მეორე ნაწილით მიმდინარეობს, რომელიც ჯარიმას, შინაპატიმრობას ან 3 წლამდე ვადით თავისუფლების აღკვეთას ითვალისწინებს. თუმცა საგამოძიებო უწყებამ სასამართლოს აღკვეთის ღონისძიების სახით გირაოს გამოყენების მოთხოვნით მიმართა.

ავტორი: ნაირა ქობულაძე