“აშშ-ის ახლადარჩეულმა კონგრესმა ხელახლა დააინიცირა საქართველოს მხარდამჭერი აქტის რედაქცია, რომელიც მხარს უჭერს საქართველოში დემოკრატიულ პროცესებს, ასევე მის ტერიტორიულ მთლიანობას, ოკუპირებულ ტერიტორიებში მოსახლეობის გადაადგილების თავისუფლებას და წარმოადგენს სერიოზულ პოლიტიკურ გზავნილს საქართველოს მოსახლეობისა და მთავრობისთვის“, – პარლამენტის საგარეო ურთიერთობათა კომიტეტის თავმჯდომარის პირველი მოადგილის, გიორგი ხელაშვილის განცხადებით, ეს სერიოზული გზავნილია იმის გამო, რომ ახლადარჩეულმა კონგრესმა თავისი ერთ-ერთი ყველაზე პირველი საგარეო პოლიტიკური განცხადება, რეზოლუცია დააინიცირა სწორედ საქართველოსთან მიმართებაში.
„მეორე მნიშვნელოვანი ფაქტორი ისა, რომ ამ ინიციატივის ინიციატორი არის კონგრესმენი კონოლი, რომელიც დემოკრატი და პრეზიდენტ ბაიდენის ერთ-ერთი ყველაზე უფრო ახლო მხარდამჭერია კონგრესში. იმავდროულად, კონგრესმენი კონოლი წარმოადგენს ნატო-ს საპარლმენტო ასამბლეის პრეზიდენტს. მეორე მხარდამჭერი რესპუბლიკური პარტიიდან კონგრესმენი კინზინგერია, რომელიც ბოლო ხანს ერთ-ერთ ყველაზე გავლენიან კანონმდებლად ჩამოყალიბდა ამერიკის კინგრესში. ეს კიდევ ერთი დასტურია იმისა, რომ ახალი კონგრესი და ახალი ადმინისტრაცია ზუსტად ისევე განუხრელად უჭერენ მხარს საქართველოს და მის მთავრობას, როგორც წინა და იმის წინა ადმინისტრაციები“, – განაცხადა გიორგი ხელაშვილმა.
ჯერი კონოლის და ადამ კინზინგერის მიერ კონგრესში წარდგენილი კანონპროექტი რუსეთის აგრესიის მიმართ აშშ-ის მტკიცე წინააღმდეგობას ადასტურებს. ამერიკის კონგრესში საქართველოსთან მეგობრობის ჯგუფის თანათავმჯდომარეებმა, ჯერი კონოლიმ და ადამ კინზინგერმა საქართველოს მხარდამჭერი აქტი კვლავ წარადგინეს.
