ზუგდიდის რეფერალურ ჰოსპიტალში სამართალდამცავები პოლიციის მიერ სოფელ ახალ აბასთუმანში დაჭრილ მამა-შვილს, პაპუნა და ბადრი ძანძავებს კითხავენ.
მანამდე ისინი ადვოკატმა ბაჩუკი ყურაშვილმა მოინახულა. როგორც უფლებადამცველმა ჟურნალისტებთან საუბარში განმარტა, მისი დაცვის ქვეშ მყოფები არ ყოფილან შეიარაღებული, მათგან პოლიციას საფრთხე არ ემუქრებოდა, შესაბამისად სამართალდამველების მხრიდან იარაღის გამოყენების საჭიროება არ იყო.
„ისინი ამბობენ, რომ შვილს ჰონდა სიგარეტი, მაგრამ არა იმ ოდენობით რა ოდენობითაც ითქვა, რომ თითქოს მათ გამოჰქონდათ დიდი ოდენობით სიგარეტი. იყო საუბარი თითქოს 15 ყუთიო, რაც შეუძლებელია ერთმა ადამიანმა გადაზიდოს. რაც შემდეგ მოხდა იმაზე აღნიშნავენ, რომ უკვე დაკავებულები იყვნენ, როცა მოხდა გასროლა. არ ყოფილა არც გამაფრთხილებელი გასროლა, არც სიტყვიერი გაფრთხილება. არც იყო გასროლის საჭიროება. როგორც თავად ახსნეს, იყვნენ დაკავებულები, არ ყოფილა წინააღმდეგობა და ასეთ ვითარებაში მოხდაო გასროლა“, – განაცხადა ადვოკატმა ბაჩუქი ყურაშვილმა.
ზუგდიდის მუნიციპალიტეტის სოფელ ახალ აბასთუმანში მამა-შვილი ცეცხლსასროლი იარაღით სამართალდამცავებმა უაქციზო სიგარეტის გადატანისას 29 აპრილს, ღამით დაჭრეს. მათ სიგარეტი სავარაუდოდ ოკუპირებული აფხაზეთიდან დანარჩენ საქართველოში გადმოჰქონდათ. შემთხვევა საოკუპაციო ხაზის სიახლოვეს მოხდა.
საავადმყოფოში აცხადებენ, რომ ორივეს მდგომარეობა ამ ეტაპზე სტაბილურია, გრძელდება კვლევები და შესაბამისი მკურნალობა.
გამოძიება დაწყებული აქვს სახელმწიფო ინსპექტორის სამსახურს და მიმდინარეობს საგამოძიებო მოქმედებები. რაც შეეხება ჩვენებას, ახლა იკითხება მამა შემდეგ დაიკითხება შვილი.
„მოცემულ შემთხვევაში მკურნალობას გადის დაჭრილი პაპუნა ძანძავა. ჯერჯერობით ვერ ვიტყვით, რომ მდგომარეობა მსუბუქია, იმიტომ რომ გაჩხერილი არის ეს ტყვიის ლულა შესაბამისად სამედიცინო ჩარევების შედეგად დასჭირდება ოპერაცია“, – ამბობს ადვოკატი.
ავტორი: თეა შონია
