ახალციხეში, დიდიმამიშვილის ქუჩაზე საცხოვრებელ კორპუსში ხანძარი გაჩნდა. ცეცხლი მეხუთე სართულზე ერთ-ერთ ბინაში, საწოლსა და იატაკს ეკიდა. შემთხვევის შედეგად, შუა ხნის მამაკაცი გარდაიცვალა.
საგანგებო სიტუაციების მართვის სამსახურში ამბობენ, რომ სახანძრო ჯგუფს მამაკაცი უკვე გარდაცვლილი დახვდა.
„სახანძრო-სამაშველო ჯგუფები ადგილზე იყვნენ ოთხ წუთში. ცეცხლი ეკიდა საწოლსა და მის გარშემო იატაკს. ხანძარი ლიმვიდირებულია. მეხანძრე-მაშველებმა სახლში იპოვეს შუა ხნის ასაკის მამაკაცის ცხედარი“.
ადგილზე გამოიძახეს სასწრაფო-სამედიცინო დახმარება, თუმცა მამაკაცის გადარჩენა ვერ მოხერხდა.
„ფეხები დამწვარი ჰქონდა და სავარაუდოდ, ნასვამ მდგომარეობაში იყო“, – გვითხრა სასწრაფო-სამედიცინო დახმარების სამსახურის ექიმმა სარვარ საფაროვმა.
შინაგან საქმეთა სამინისტროს განცხადებით, გამოძიება სისხლის სამართლის 187-ე მუხლის მესამე ნაწილით დაიწყო, რაც გულისხმობს ნივთის დაზიანებას ან განადგურებას, რამაც გაუფრთხილებლობით გამოიწვია ადამიანის სიცოცხლის მოსპობა ან სხვა მძიმე შედეგი.
ავტორი: რუსკა გვარამაძე
