ბერლინის კლინიკის „შარიტეს” განცხადებით, ოპოზიციონერი ალექსეი ნავალნის სიცოცხლეს საფრთხე აღარ ემუქრება.
კლინიკა წერილობით განცხადებაში აღნიშნავს, რომ იგი ჯერ კიდევ რჩება კომაში და მართვითი სუნთქვის აპარატზეა შეერთებული. ინტოქსიკაციის სიმპტომები კი, ნელ-ნელა ქრება. ექიმებმა მისი მდგომარეობა სტაბილურად შეაფასეს.
„მიუხედავად იმისა, რომ მდგომარეობა მძიმეა, მის სიცოცხლეს პირდაპირი საფრთხე არ ემუქრება”, — ნათქვამია კლინიკის განცხადებაში.
კორუფციასთან ბრძოლის ფონდის ხელმძღვანელი, ალექსეი ნავალნის პრესმდივნის ინფორმაციით, ის მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია. ინტოქსიკაცია დაადასტურა გერმანულმა კლინიკამაც.
თავდაპირველად, 20 აგვისტოს, ნავალნი ომსკის კლინიკაში მოათავსეს, სადაც თქვეს, რომ მის ორგანიზმში რაიმე საეჭვო ნივთიერება არ აღმოჩნდა.
22 აგვისტოს ნავალნი სპეცთვითმფრინავით რუსეთიდან გერმანიაში გადაიყვანეს. ექიმებმა დაადასტურეს, რომ საქმე „შესაძლო” მოწამვლასთან იყო. დღემდე კლინიკის მახლობლად პოლიციის რამდენიმე ავტობუსი და 10-მდე სამართალდამცველი მორიგეობს.
ალექსეი ნავალნის მოწამვლის საქმის გამოძიება მოითხოვეს გერმანიის კანცლერმა, ანგელა მერკელმა, ევროკავშირის უმაღლესმა წარმომადგენელმა, ჟოზეფ ბორელმა და აშშ-ს სახელმწიფო მდივანმა, მაიკ პომპეომ. გამოძიებაში მხარდაჭერა აღუთქვა დიდი ბრიტანეთის პრემიერმინისტრმა, ბორის ჯონსონმა.
რუსეთის დუმის კომიტეტმა გამოძიება დაიწყო, რუსეთს პრეზიდენტი ვლადიმერ პუტინი კი აცხადებს, რომ ობიექტური გამოძიების მომხრეა.
