„მოპარული ქონება“, „ხვალ ალბათ ქონებას გაგიორმაგებენ“, „სინდისში გაცვლილი ქონება“, „ნეტა სინდისი არ გაწუხებს“ – ამ ბანერებით „ალტერნატივას“ წევრებმა გონიოში უმაღლესი საბჭოს დეპუტატ ირაკლი ჩავლეიშვილის სასტუმროსთან აქცია გამართეს.
როგორც „ალტერნატივას“ ხელმძღვანელი ხათუნა ბერიძე აცხადებს, ირაკლი ჩავლეიშვილი გაურიგდა „ქართულ ოცნებას“ და აჭარის უმაღლეს საბჭოში თავისი ბიზნესინტერესების დასაცავად შევიდა, რადგან ამ ხელისუფლების პირობებში თუ მათთან არ თანამშრომლობა, ატერორებენ ბიზნესს, სამსახურებიდან ათავისუფლებენ ადამიანებს, რომლებიც მათი ინტერესების გამტარებლები არ არიან, შესაძლო იყო ჩავლეიშვილის ქონებას საფრთხე შექმნოდა და მისი ბიზნესი ვერ განვითარებულიყო, ამიტომ მან ამჯობინა ეღალატა საკუთარი მოსახლეობისთვის, ვიდრე ცოტა ხნით უფულოდ ყოფილიყო
“ჩვენ სიმბოლურად შევიკრიბეთ ჩავლეიშვილის სასტუმროსთან, ვინაიდან, ზუსტად ამ სასტუმროსა და საკუთარი ბიზნესინტერესების გამო მან უღალატა საკუთარ ამომრჩეველს და გასწირა ციხისთვის ადამიანი, რომელიც არის აფხაზეთიდან დევნილი, რომელმაც მშობლები დაკარგა და მის მშობლებს ჩააფურთხა საფლავში პირდაპირი მნიშვნელობით ირაკლი ჩავლეიშვილმა, როდესაც მას უწოდა გაუზრდელი, ეტყობა ოჯახში არ აღზრდილაო. გარდაცვლილ მშობლებს შეეხო, იმდენად ამორალურია მისი ქმედება.
კიდევ ერთხელ მინდა ვთქვა, არავის არ მოსწონს ნაგვის თავზე დაყრა და ამის ყურება, თუმცა ირაკლი ჩავლეიშვილმა დაიმსახურა ის, რომ აღშფოთებულმა მისმა ამომრჩეველმა, რომელიც კარდაკარ დადიოდა მასთან ერთად სიცივესა და ყინვაში და არწმუნებდა ამომრჩეველს, რომ ჩავლეიშვილისთვის მიეცათ ხმა, ასეთი ჩინოვნიკები რომ გვყავს ქვეყანაში, იმიტომ ამდენ ხანს ვერ განვითარდა ქვეყანა და ისევ მათივე მეთოდებით გვიწევს დღეს ჩვენ ბრძოლა.
ჩვენ ყოველთვის ვიბრძოლებთ უსამართლობის წინააღმდეგ და გამოვააშკარავებთ ყველა მსგავს ადამიანს, მსგავს არ განვიმეორებთ და ეს იქნება მაგალითი ყველასთვის, რომ შემდგომში ვეღარავინ გაბედოს საკუთარი ერისა და მოქალაქეების ღალატი“, – განაცხადა ხათუნა ბერიძემ.
შეგახსენებთ, აჭარის უმაღლესი საბჭოს უპარტიო დეპუტატს, “გაერთიანებული ოპოზიციისა” და “,რესპუბლიკური პარტიის” ყოფილ წევრ ირაკლი ჩავლეიშვილს, რომელმაც დეპუტატის მანდატზე უარი არ თქვა, “ერთიან ნაციონალურ მოძრაობასთან” აფელირებული არასამთავრობო ორგანიზაციის წევრებმა ნაგვის ურნიდან ნაგავი დააყარეს. შს სამინისტრომ ფაქტზე გამოძიება ორი მუხლით, დევნა და ხულიგნობა, აღძრა, დაკავებილია “ალტერნატივას” ერთი წევრი ირაკლი ფანგანი, რომელსაც ბრალს დღეს წარუდგენენ.
ავტორი: ნაირა ქობულაძე
